Goa Tourism: शिवोलीत पर्यटकांना मारहाण; दोघांना अटक

Goa Tourism: वाडी-शिवोलीतील एका नामांकित रेस्टॉरंटच्या पार्कींग लॉबीत दिल्लीतील दोघा पर्यटकांना जबर मारहाण केल्याप्रकरणी प्रवीण प्रकाश पाथरुड आणि जलील अहमद या दोघा बाउन्सरना हणजूण पोलिसांनी अटक केली आहे.

पार्किंग जागेत आपल्या दुचाकीला धडक दिल्याच्या कारणावरून या बाउन्सरनी दोघा पर्यटकांना मारहाण केली. ही घटना रविवारी दुपारी घडल्यानंतर पर्यटकांनी हणजूण पोलिसात दिलेल्या तक्रारीनुसार हणजूण पोलिसांनी या दोघा बाउन्सरना रात्री उशिरा अटक केली.

शैलेश झा आणि शाहीद फाजल हे दिल्लीस्थित पर्यटक वाडी-शिवोलीतील एका नामांकित रेस्टॉरंटमध्ये आले होते.

यावेळी पार्किंग करताना त्यांच्या कारची धडक पाथरुड आणि जलील अहमद यांच्या दुचाकीला बसल्यानंतर त्यांच्यात वाद होऊन ही मारहाण झाली.

या प्रकरणी पोलिस उपनिरीक्षक स्नेहा सावळ, निरीक्षक प्रशाल देसाई यांच्या मार्गदर्शनाखाली हणजूण पोलिस अधिक तपास करीत आहेत.