मोरजी: तुये-पेडणे येथे झालेल्या गंभीर अपघातात जखमी झालेले अंकुश नागवेकर (४५, रा. चावदेवाडा-पार्से) यांचा मंगळवारी पहाटे गोमेकॉत उपचार सुरू असताना मृत्यू झाला. २१ डिसेंबर रोजी हा अपघात झाला होता.
अंकुश नागवेकर हे सध्या पेडणे येथे वास्तव्य करून होते. त्यांचे मूळ पार्से येथील आहेत. मोरजी येथे पेडणे तालुका मर्यादित बुद्धिबळ स्पर्धा आयोजित करण्यात आली होती. त्या स्पर्धेत त्यांच्या मुलाने प्रथम क्रमांक पटकावला होता. तो चषक दाखवून व आपल्या आईचा आशीर्वाद घेऊन (मुलाची आजी) पार्से येथून पुन्हा पेडणे येथे जात असताना त्यांच्या दुचाकीला तुये इस्पितळासमोर अपघात झाला.
त्यात ते गंभीर जखमी झाले होते. मुलाला किरकोळ दुखापत झाली होती. दरम्यान, नागवेकर यांच्या अकाली निधनामुळे गावावर शोककळा पसरली आहे. त्यांच्या पश्चात पत्नी, एक मुलगा व पाच विवाहित भाऊ असा परिवार आहे.
दुचाकीवर मुलाला घेऊन पेडण्याच्या दिशेने निघालेले अंकुश नागवेकर यांना रस्त्यावर अंधारात बसलेल्या गुरांचा अंदाज आला नाही. त्या गुरांना वाचविण्याच्या नादात हा अपघात झाला व पिता-पुत्र रस्त्यावर आदळले. त्याचवेळी मागून येणाऱ्या चारचाकी वाहनाची धडक बसल्याने अंकुश नागवेकर गंभीर जखमी झाले. उपचारांसाठी त्यांना गोमेकॉत दाखल करण्यात आले होते. अखेर आज त्यांची प्राणज्योत मालवली.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.