Sahitya Akademi Award: तुकाराम शेट, तन्वी बांबोळकरना साहित्य अकादमी; युवा व बाल साहित्य विभाग

साहित्य अकादमीने २०२३ या वर्षासाठीचे युवा व बाल साहित्य पुरस्कार जाहीर केले.‍ कोकणी भाषेतील बाल साहित्य पुरस्कार तुकाराम रामा शेट यांच्या ‘जाण’ या कादंबरीला; तर युवा पुरस्कार डॉ. तन्वी कामत बांबोळकर यांच्या ‘शॉट’ लघुकथा संग्रहाला मिळाला.

मराठी भाषेत एकनाथ आव्हाड यांना बाल साहित्यासाठी, तर विशाखा विश्वनाथ यांना युवा साहित्यासाठी गौरवण्‍यात आले.

मानपत्र आणि ५० हजार रोख असे या पुरस्काराचे स्वरूप आहे. मुख्यमंत्री डॉ. प्रमोद सावंत यांनी पुरस्कारप्राप्त साहित्यिकांचे अभिनंदन केले.

बाल साहित्यामध्ये विविध भाषांतील २२ साहित्यिकांच्या पुस्तकांना आणि युवासाहित्यासाठी २० लेखकांच्या पुस्तकांना पुरस्कार दिला आहे. लवकरच पुरस्कार प्रदान सोहळ्याचे आयोजन करण्यात येणार असून या सोहळ्यामध्ये पुरस्कार दिले जाणार असल्याचे साहित्य अकादमीने स्पष्ट केले आहे.

यंदा काश्मीर भाषा साहित्य पुरस्कार जाहीर केलेला नाही. मणिपूरी भाषेतील साहित्य पुरस्कार लवकर जाहीर केला जाणार आहे, अशी माहिती राष्ट्रीय साहित्य अकादमीच्या प्रसिद्धी पत्रकातून देण्यात आली आहे.

पुरस्कार प्राप्त साहित्यिकांचे मुख्यमंत्र्यांकडून अभिनंदन!

पुरस्कार मिळाल्याचे कळल्यावर मला अतीव आनंद झाला. मी त्यामुळे हर्षित झालेच; पण त्याहीपेक्षा आता माझी जबाबदारी आणखी वाढली आहे, याची जाणीव झाली.

- डॉ. तन्वी कामत बांबोळकर

गेली ३० वर्षे मुलांसाठी लिहितोय त्याची पोचपावती मिळाली, असे वाटते आहे. काही वर्षांपूर्वी एका लहान मुलाने कविता वाचून मला बरीच वर्षे जपून ठेवलेले मोरपीस दिला. तोच माझ्यासाठी पुरस्कार होता.

- एकनाथ आव्हाड

बालपणात आलेले अनुभव आणि त्‍यावेळचा सर्वांना उभारी देणारा निसर्ग यावर आधारित मी ‘जाण’ ही कादंबरी लिहिली. वाचून लहान मुलांना उत्तम अनुभूती मिळेल, अशी खात्री आहे.

- तुकाराम शेट

गमभन प्रकाशनने माझ्यावर दाखवलेला विश्वास या साऱ्याचे सार्थक झाल्यासारखं वाटतंय. इथून नवं लिखाण करण्याची नवी उमेद मला मिळेल. अकादमी पुरस्कार हे मला परिकथेसारखे वाटतंय.

- विशाखा विश्वनाथ