Goa News : पंतप्रधान नरेंद्र मोदींमुळे देश सुरक्षित; लोकसभा निवडणुकीत भाजपला पुन्हा एकदा संधी द्यावी : माविन गुदिन्हो

Bicholim : पंतप्रधान नरेंद्र मोदी हे दूरदृष्टीचे नेते आहेत. त्यांच्या कुशल नेतृत्वामुळे देश सुरक्षित आणि प्रगतिपथावर आहे. गोवा राज्यातही विकासाची घोडदौड सुरू असून पर्यावरणाचा सांभाळ करूनच राज्याचा विकास करण्यासाठी सरकार आग्रही आहे, असे प्रतिपादन पंचायतमंत्री माविन गुदिन्हो यांनी केले.

मये येथे ‘लाभार्थी मेळाव्या’त ते प्रमुख पाहुणे म्हणून बोलत होते. ‘काम सरो, वैद्य मरो’ याचे अनुकरण न करता जनतेने भाजपच्या पाठीशी खंबीरपणे उभे रहावे. पुढील वर्षी होणाऱ्या लोकसभा निवडणुकीत भाजपला पुन्हा एकदा संधी द्यावी, असे आवाहन गुदिन्हो यांनी करुन जनता भाजपच्याच बाजूने राहील, असा विश्वास व्यक्त केला.

कुंभारवाडा-मये येथील श्री सातेरी देवस्थान सभागृहात या लाभार्थी मेळाव्याचे आयोजन करण्यात आले होते. आमदार प्रेमेंद्र शेट यांच्यासह जिल्हा पंचायत सदस्य शंकर चोडणकर, महेश सावंत, भाजपचे प्रवक्ते प्रेमानंद महांबरे, मयेच्या सरपंच सुवर्णा चोडणकर, पिळगावच्या सरपंच मोहिनी जल्मी, भाजप मंडळ अध्यक्ष दयानंद कारबोटकर, महिला मोर्चा अध्यक्ष आरती बांदोडकर उपस्थित होत्या.

कवाथे, मंजुरीपत्रांचे वाटप

या मेळाव्यात अटल आसरा योजना मंजूर झालेल्या लाभार्थ्यांना मंत्री माविन गुदिन्हो यांच्या हस्ते मंजुरीपत्रांचे वितरण करण्यात आले. कवाथ्यांचेही यावेळी वाटप करण्यात आले. आमदार प्रेमेंद्र शेट यांच्या पत्नी प्रिया शेट यांच्यासह शीतल सावळ आणि देविया धावस्कर या लाभार्थींनी भाजप सरकारने सुरू केलेल्या योजना किती आणि कशा लाभदायक आहेत त्याबद्दल आपला अनुभव कथन केला. विश्वास चोडणकर यांनी सूत्रसंचालन केले. पार्सेकर यांनी आभार मानले.