फातोर्डा: मडगावात पार्किंगची समस्या जटिल बनली असून एका नियोजित ठिकाणी दुचाकी किंवा चारचाकी वाहन उभे करण्यासाठी तीन चार फेऱ्या माराव्या लागतात. गेल्या 7 वर्षांपासून रखडत पडलेल्या बहुमजली वाहन पार्किंग तळाच्या कामाला प्रत्यक्षात सुरवातही झाली नसून वाहनांत मात्र बेसुमार वाढ होत आहे. त्यामुळे मडगाव शहराला वाहन पार्किंगसाठी जागा अपुरी पडत आहे. शहरातील अनेक ठिकाणच्या रस्त्यांवर जुनी भंगार स्थितीतील वाहने उभी करून ठेवल्याने वाहतुकीला अडथळा निर्माण होत आहे.
पालिका क्षेत्राच्या लोकसंख्येबरोबरच वाहन संख्याही वाढत आहे. याबरोबरच सभोवतीच्या परिसरातील वाहनेही या शहरात दाखल होत आहेत. वाहने वाढली तरी शहरातील रस्ते तितकेच राहिल्याने स्वाभाविक पार्किंगची समस्या निर्माण झाली आहे. ही समस्या दिवसेंदिवस गंभीर बनत चालली आहे. पार्किंगसाठी जागा मिळत नसल्याने रस्त्यावर कशाही पद्धतीने वाहने उभी केली जात असल्याने जागा व्यापते व वाहतूक कोंडी होते. नागरिकांना वाहने पार्किंग करण्यासाठी नियोजित जागा उपलब्ध नसल्याने सर्वत्र रस्त्यावर होणाऱ्या बेकायदा पार्किंगचे प्रमाण वाढले आहे. यामुळे अनेक प्रश्न निर्माण झाले आहेत. रस्त्यांवर नागरिकांना चालणे मुश्कील होऊन बसले असून सगळ्यांनाच त्याचा प्रचंड त्रास होत आहे. स्थानिक प्रशासनाने याबाबत ठोस भूमिका घेऊन या प्रश्नी लवकरात लवकर तोडगा काढण्याची मागणी जोर धरीत आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
