गोव्यातील समुद्र किनाऱ्यांवर 'व्हॅलेंटाईन डे'ची धूम

मरगाव: व्हॅलेंटाईन डे साजरा करण्यासाठी सोमवारी पर्यटकांनी बाणावली आणि कोलवा समुद्र किनाऱ्यांना भेट दिली. पर्यटकांनी समुद्रात खेळण्याचा आणि वाळूवर फेरफटका मारण्याचा आनंद लुटला, तर स्थानिकांनी त्यांच्या कुटुंबियांसोबत वेळ घालवला.

दिवसभर पर्यटकांची (Tourist) वर्दळ असलेल्या समुद्र किनाऱ्यांवर संध्याकाळी स्थानिकांची रेलचेल होती. समुद्रकिनार्‍यांवरील शॅक आणि रेस्टॉरंट्स लाल फुलांनी सजवली होती. अनेक लोक मतदान करून व्हॅलेंटाईन डे साजरा करण्यासाठी घराबाहेर पडले होते.

व्हॅलेंटाईन डेच्या (Valentine's Day) निमित्ताने काही विदेशी पर्यटकांनी देखील गोव्याला भेट दिली. या महिन्याच्या अखेरीस राज्यात साजरा होणार्‍या कार्निव्हलसाठी पर्यटक राज्यात येतील अशी अपेक्षा आहे.

सोमवारी गोव्यात विधानसभा निवडणुकीचे (Goa Assembly Election) मतदान पार पडले. रणरणत्या उन्हात रांगेत उभे राहून मतदारांनी मतदानाचा हक्क बजावला. राज्यात काल 78.94% मतदान झाले. मतदानानंतर सर्वांना आता निकालाची प्रतीक्षा आहे. मात्र, त्यासाठी 10 मार्च पर्यंत थांबावे लागणार आहे.