‘त्या’ दुचाकीस्वारांविरोधात कारवाई बंद! पर्यटनमंत्र्यांच्या हस्तक्षेपानंतर वाहतूक खातं अ‍ॅक्शनमोडमध्ये

पर्यटनमंत्री रोहन खंवटे यांनी लक्ष घातल्याने म्हापसा परिसरात ऑनलाईन पद्धतीने साहित्य पुरवठा करणाऱ्या दुचाकीस्वारांविरोधातील वाहतूक खात्याची कारवाई बंद झाली आहे. म्हापशातील एका जागृत नागरिकाने हा प्रकार उघडकीस आणला होता.

तो नागरिक ज्येष्ठ नागरिक असल्याने सहसा घराबाहेर पडत नाही. तो ऑनलाईन खरेदी करतो. त्याला साहित्य मिळण्यास १० मिनिटे लागत असताना अचानकपणे अर्धा तास लागू लागला होता. त्याने हे साहित्य पुरवणाऱ्या दुचाकीस्वारांकडे विचारल्यावर वाहतूक खात्याने खासगी दुचाकींचा वापर साहित्य पुरवण्यासाठी होत असल्याचे कारण देत दंडात्मक कारवाई सुरू केली होती.

त्या नागरिकाने पर्यटनमंत्र्यांकडे कैफीयत मांडून पर्यटन व्यवसायाला याचा कसा फटका बसेल हे पटवून दिले होते. त्यानंतर खंवटे यांनी हा विषय वाहतूक संचालकांकडे उपस्थित केला. वाहतूक संचालकांनी यापुढे कारवाई केली जाणार नाही,अशी माहिती खंवटे यांना व्हॉटसॲपवर दिल्यावर ती माहिती खंवटे यांनी त्या नागरिकाला दिली आहे.