Goa Tourism: राज्यभरात 75 ठिकाणी वायफाय-हॉटस्पॉट सुविधा

Goa Tourism: राज्य सरकार विद्यार्थ्यांच्या आणि सर्वांच्या फायद्यासाठी राज्यभरातील सर्व 40 मतदारसंघांमध्ये 75 ठिकाणी वायफाय-हॉटस्पॉट्स सुविधा देणार आहे. त्याचप्रमाणे दोन महिन्यांत आध्यात्मिक, साहसी व आरोग्यविषयक धोरण उपलब्ध करून दिले जाईल, अशी घोषणा आयटी तथा पर्यटनमंत्री रोहन खंवटे यांनी शुक्रवारी (ता.२६) केली.

प्रजासत्ताक दिनाचे औचित्य साधून शुक्रवारी म्हापसा येथील शासकीय संकुलात मंत्री खंवटे यांच्या हस्ते ध्वजारोहण सोहळा पार पडला. यावेळी अतिरिक्त जिल्हाधिकारी पुंडलिक खोर्जुवेकर, बार्देश उपजिल्हाधिकारी गुरुदास देसाई,

बार्देश मामलेदार प्रवीण गावस, संयुक्त मामलेदार आदी उपस्थित होते. तसेच, पोलिस उपअधीक्षक संदेश चोडणकर, पोलिस निरीक्षक सीताकांत नायक यांच्यासह उल्हास अस्नोडकर आणि अनेक मान्यवर उपस्थित होते.

पंतप्रधान नरेंद्र मोदी यांच्या नेतृत्वाखाली व केंद्र सरकारच्या पाठिंब्यामुळे मोपा विमानतळ, पूल, रस्त्यांचे रुंदीकरण असे विविध प्रकल्प हाती घेतल्याने राज्याचा सर्वच क्षेत्रात विकास झाला आहे.

पंतप्रधान मोदींच्या गोवा भेटीदरम्यान पणजी येथे रोपवे प्रकल्प आणि थ्रीडी प्रिंटिंग इमारतीसह दोन मोठे पर्यटन प्रकल्प सुरू केले जातील, असे खंवटे यांनी सांगितले.