सुकतळी-मोले येथील राष्ट्रीय महामार्गावर गेल्‍या दोन दिवसांपासून नादुरुस्‍त अवस्‍थेत उभा असलेल्‍या ट्र्कला पाठीमागून जोरदार धडक दिल्‍याने दुचाकीस्‍वार तन्‍वेष रिवणकर (२५, रा. कुळे) या युवकाचा जागीच मृत्यू झाला. काल सोमवारी मध्‍यरात्री बाराच्‍या सुमारास हा अपघात घडला. ट्र्कचालक मंजुनाथ शिवा बसनावर याला कुळे पोलिसांनी ताब्यात घेतले आहे.
दरम्‍यान, बोलशे-फातोर्डा सर्कलकडून रावणफोंडच्या दिशेने जाताना मॅक्स शो रुमजवळ रस्त्यावर घसरुन पडल्याने दुचाकीचालक ऑलविन फर्नांडिस (फातोर्डा) याचा तर लोटली येथे मध्यरात्रीनंतर एका अवजड वाहनाने पादचाऱ्याला ठोकरल्‍याने त्‍याचा मृत्यू झाला. मृताची ओळख पटलेली नाही. पोलिस (Police) त्‍या वाहनाचा शोध घेत आहेत.
दरम्‍यान, तन्‍वेष याची आई मुख्याध्यापिका तर वडील शिक्षक म्हणून निवृत्त झाले आहेत. त्‍यांचा तन्‍वेष हा एकुलता एक मुलगा. तोच अपघातात मरण पावल्‍यामुळे त्‍याच्‍या आईवडिलांवर दुःखाचा डोंगर कोसळला आहे.
तन्‍वेषच्‍या मृत्‍यूची बातमी वाऱ्यासारखी कुळे व आजूबाजूच्या गावांत पसरली तेव्हा लोकांनी ताबडतोब घटनास्थळी धाव घेतली. अपघातात कारणीभूत ठरलेल्या ट्रकचालकावर गुन्‍हा नोंद करावा अशी मागणी करत त्‍यांनी राष्ट्रीय महामार्ग अडवण्याचा प्रयत्न केला.
त्‍यामुळे कुळे पोलिस निरीक्षक सगुण सावंत यांनी घटनास्थळी धाव घेऊन संतप्‍त लोकांची समजूत काढली व राष्ट्रीय महामार्ग वाहतुकीसाठी मोकळा करून दिला. तसेच मंजुनाथ बसनावर याच्‍याविरोधात गुन्‍हा दाखल केला.
दोन दिवसांपूर्वी कर्नाटकातून गोव्यात आलेला ट्र्क सुकतळी येथे चढणीवर बंद पडला. तेव्‍हापासून तो तेथेच उभा आहे. काल सोमवारी रात्री तन्‍वेष हा ओला दुचाकीने उसगावमार्गे कामावर जात होता. सदर चढणीवर पोहोचला असता दुसऱ्या बाजूने येणाऱ्या गाडीच्या प्रकाशामुळे त्‍याला समोर पार्क केलेला ट्रक स्‍पष्‍ट दिसला नाही आणि हा अपघात घडला.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.