महिला कर्मचाऱ्याचा लैंगिक छळ, आयकर निरीक्षकांविरोधात गुन्हा दाखल

पणजी : आपल्यासोबत काम करणाऱ्या महिला कर्मचाऱ्याशी गैरवर्तन केल्याप्रकरणी पणजीतील 3 आयकर निरीक्षकांवर गुन्हा दाखल करण्यात आला आहे. या तिंघांवरही लैंगिक छळ करणे, वाईट नजरेने पाहात राहणे आणि महिला कर्मचार्‍याशी अपमानजनक वागणे अशा आरोपांखाली पणजी पोलिस स्टेशनमध्ये गुन्हा दाखल करण्यात आला आहे.

पणजीतील पाटो परिसरात आयकर विभागाचं कार्यालय आहे. या कार्यालयात काम करणाऱ्या एका महिला कर्मचाऱ्याने आपल्या सहकाऱ्यांकडून लैंगिक छळ होत असल्याचा गंभीर आरोप केला आहे. यात मनिंदर सिंग अत्तारी, आदित्य वर्मा आणि दीपक कुमार या आयकर निरीक्षकांविरुद्ध 354, 354 अ, 354 ड, 506(ii) कलमांखाली गुन्हा नोंद करण्यात आला आहे. मनिंदर सिंग याने संबंधित पीडितेशी तिच्या इच्छेविरुद्ध वारंवार शारीरिक जवळीक साधण्याचा प्रयत्न केल्याचा आरोप करण्यात आला आहे. यासोबतच पीडितेच्या मनात लज्जा उत्पन्न होईल अशा शब्दांचा वापर करुन तिला मिठी मारण्याचा प्रयत्न केल्याचंही पोलिसांनी स्पष्ट केलं आहे.

दरम्यान आदित्य वर्मा याने महिलेकडे नेहमी वाईट नजरेने पाहात असल्याचं तक्रारीत नमूद करण्यात आलं आहे. तर दीपक कुमार याने महिलेशी तिच्या इच्छेविरुद्ध वारंवार जवळीक साधण्याचा प्रयत्न केला. तसंच तिला स्पर्श करुन तिच्याशी शारीरिक संबंधांची मागणी केल्याचा आरोप करण्यात आला आहे. यासोबतच त्याने महिलेसोबत अश्लील संभाषण केल्याचंही पोलिसांनी सांगितलं आहे. गेल्या फेब्रुवारी महिन्यापासून या सर्व गोष्टी पीडितेसोबत सुरु होत्या, मात्र अखेर हे सगळं असह्य झाल्याने तिने पोलीस स्टेशन गाठत तिघांविरोधात तक्रार दाखल केली आहे.

मनिंदर आणि दीपक यांनी याबाबत बाहेर कुठेही वाच्यता केल्यास गंभीर परिणाम भोगावे लागतील अशा आशयाची धमकी दिल्याचंही तक्रारीत सांगण्यात आलं आहे. पणजी पोलीस स्टेशनचे निरीक्षक निखिल पालेकर यांच्या मार्गदर्शनाखाली उपनिरीक्षक लॉरिन सिक्वेरा याप्रकरणी तपास करत असून अद्याप आरोपींना अटक करण्यात आली नसल्याची माहिती आहे.