जाळी ओढताना समुद्रकिनारी मच्छीमाराचा मृत्यू तर, घसरुन पडल्याने दोघांनी गमावला जीव

मडगाव: गोव्यात सोमवारी (२९ जुलै) एकाच दिवशी तीन वेगवेगळ्या घटनेत तिघांचा मृत्यू झाला. कासावली समुद्रकिनारी मासेमारीची जाळी ओढताना एका मच्छीमार कामगाराचा मृत्यू झाला तर दक्षिण गोव्यात घसरून खाली पडल्याने दोघांना मृत्यू आला.

या दोघांनाही मडगाव येथील जिल्हा इस्पितळात दाखल करण्यात आले होते. दरम्यान, डॉक्टरांनी त्यांना मृत घोषित केले.

पहिली घटना फातोर्डा येथे घडली. चंद्रवाडा येथे एका रो हाऊसमध्ये राहणारा विनीत धारेश्वर (५२) हा गच्चीवर घसरून पडून जखमी झाल्याने मृत पावला तर दुसऱ्या घटनेत बागा-आंबेली येथे राहणाऱ्या वियेना लिमोस (८४) ही घरात पडून जखमी झाल्याने तिला इस्पितळात दाखल केले होते. तिथे उपचार चालू असताना तिचे आज निधन झाले.

समुद्रात मासेमारी करण्यासाठी गेलेला होडीतील कामगार जाळे ओढत असताना अचानक खाली कोसळल्याने त्याचे निधन झाले. सोमवारी (२९ जुलै) उघडकीस आलेल्या या घटनेत कम्मार याराना (४५. रा. मूळ आंध्र प्रदेश) याचा मृत्यू झाला.

कम्मार खाली कोसळल्यानंतर त्याला इतर कामगारांनी कासावली येथील आरोग्य केंद्रावर दाखल केले, पण तेथे त्याला मृत घोषित करण्यात आले.

कम्मारचा मृत्यू कशामुळे झाला याबाबत अधिक माहिती समोर आलेली नाही. पण, छातीत दुखू लागल्याने तो खाली कोसळला अशी माहिती त्याच्या सहकाऱ्यांनी दिली.