चोरट्यांनी आमदारालाही नाही सोडले, मायकल लोबो यांच्या रेस्टॉरंटमध्ये चोरी; रोकड लंपास

म्हापसा: गणेशपुरी-म्हापसा येथील डॉ. महेंद्र कामत घाणेकर यांच्या बंगल्यावरील दरोड्याचे प्रकरण गाजत असताना चोरट्यांनी आता आमदाराच्या रेस्टॉरंटला लक्ष्य केले आहे. कळंगुटचे आमदार मायकल लोबो यांच्या हणजूण येथील रेस्टॉरंटमध्ये चोरी झाल्याचे उघडकीस आले आहे. चोरट्यांनी रेस्टॉरंटमधून रोकड लंपास केल्याची माहिती समोर आली आहे.

मिळालेल्या माहितीनुसार, हणजूण येथील “पिस्को – बाय दी बीच” या रेस्टॉरंटमध्ये चोरी झाली आहे. तीन दिवसांपूर्वी ही चोरी झाल्याचे सांगितले जात आहे. हणजूण पोलिसांनी याप्रकरणी तक्रार दाखल केली आहे. पिस्को रेस्टॉरंट आमदार मायकल लोबो यांच्या मालकीचे आहे. चोरट्यांनी किती रुपयांची चोरी केलीय हे अद्याप स्पष्ट झालेले नाही. दरम्यान, पोलिसांनी याप्रकरणाचा तपास सुरु केला आहे.

म्हापसा येथे सशस्त्र टोळीच्या घातलेल्या दरोड्यांनंतर स्थानिक आक्रमक झाले असून, पोलिस आणि सरकारला प्रश्न विचारला जात आहे. डॉ. घाणेकर यांच्या घरावर घातलेल्या या दरोड्यात रोख रक्कम, मौल्यवान वस्तू असा मिळून ३५ लाखांचा ऐवज चोरी करण्यात आला. पोलिसांनी याप्रकरणी आता तिघांना अटक केली आहे.

दरम्यान, गोव्यातील वाढत्या चोरीच्या घटनांमुळे नागरिकांची चिंता वाढली आहे. रात्रीच्या सुमारास अशा घटना घडत असल्याचे रहिवासी सोसायटी आणि वस्तींमध्ये भीतीचे वातावरण आहे. यासाठी पोलिसांनी गस्त वाढवावी अशी मागणी केली जात आहे.