Shree Zareshwar Temple: फोंड्यातील झरेश्‍वर देवस्थानात चोरी; चोरट्यांनी मारला मोठा डल्ला

फोंड्यातील जुन्या बसस्थानकाच्या एका बाजूला असलेल्या झरेश्‍वर देवस्थानची फंडपेटी फोडून अज्ञात चोरट्यांनी हजारो रुपये लंपास केल्याचा अंदाज व्यक्त करण्यात येत आहे. बुधवारी सकाळी हा चोरीचा प्रकार उघडकीस आला.

फोंड्यातील या जागृत देवस्थानात ही चोरी करण्याचे धाडस चोरट्यांनी दाखवले असून चोरट्यांनी फंडपेटीचे कुलूप तोडून आतील पैसे लंपास केले. मात्र चिल्लर तेवढे फंडपेटीत सोडून चोरटे पळाले. आश्‍चर्याची बाब म्हणजे फोंडा पोलिस स्थानकाच्या मागच्या बाजूला हाकेच्या अंतरावर हे मंदिर आहे.

चोरट्यांनी काल पडत असलेल्या पावसाचा फायदा घेत ही चोरी केली असावी, असा कयास व्यक्त करण्यात येत आहे. या चोरीप्रकरणी देवस्थानतर्फे फोंडा पोलिसांना कळवल्यानंतर त्यांनी लगेच धाव घेतली व चौकशी केली; पण चोरटे काही सापडू शकले नाहीत. चोरट्यांनी नेमके किती पैसे पळवले त्याचा अंदाज नसल्याचे देवस्थानच्या पदाधिकाऱ्यांनी सांगितले. पोलिस याप्रकरणी अधिक तपास करीत आहेत