होंडा पंचायत क्षेत्रातील क्रीडापटूंना प्रोत्साहन मिळावे, यासाठी सध्या दोन ठिकाणी प्रशस्त मैदानांचे काम जोमाने सुरू आहे. यामध्ये गेल्या कित्येक वर्षांपासून रेंगाळलेल्या नारायणनगर येथील मैदानाचा विकास तसेच होंडा बस स्थानकासमोरील जागेत फुटसाल मैदान यांचा समावेश आहे.
पर्ये मतदारसंघात येणाऱ्या होंडा पंचायत क्षेत्रात झपाट्याने लोकवस्ती वाढत चालली आहे. त्यामुळे या भागातील नागरिक तसेच युवा वर्गाला अपेक्षित साधनसुविधा उपलब्ध करून देणे गरजेचे आहे. येथील युवकांना क्रीडा क्षेत्रात प्रोत्साहन देण्यासाठी सुसज्ज अशा मैदानांची गरज होती.
नारायण नगरातील पंचायतीच्या मालकीच्या मैदानावर साधनसुविधांचा अभाव असल्याने तेथे विविध प्रकारच्या क्रीडा स्पर्धा आयोजित करताना आयोजकांना अनेक समस्या भेडसावत होत्या. या मैदानावर साधनसुविधा उपलब्ध करून द्यावी, अशी मागणी केली जात होती.
होंडा बस स्थानकासमोरील वाहतूक खात्याच्या अधिकार क्षेत्रातील मोकळी जागा हस्तांतरित करून त्याठिकाणी या भागातील युवकांसाठी फुटसाल मैदान तयार करण्याचे नियोजन केले असून प्रत्यक्ष कामाला सुरुवातही झाली आहे. त्यामुळे होंडा पंचायत क्षेत्रातील क्रीडापटूंना उत्कृष्ट क्रीडा सुविधा मिळणार आहेत. या मैदानांवर लाखो रुपये खर्च करण्यात येणार आहेत.
सत्तरी तालुक्यातील युवा वर्गामध्ये क्रीडा क्षेत्रात उच्च दर्जाचे गुण आहेत; परंतु त्यांना पुरेशा साधनसुविधा उपलब्ध होत नसल्याने त्यांच्यातील कलागुणांना वाव मिळत नाही. त्यासाठी पर्ये मतदारसंघात शक्य तेथे मैदाने निर्माण करण्यात येतील. नारायणनगर येथील मैदानाचा विकास व नवीन फुटसाल मैदान तयार करण्याचे काम हाती घेतले आहे.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.