सासष्टी, १ जुलै २०२४ पासून भारतीय साक्ष अधिनियम २०२३ हा नवीन कायदा लागू होणार आहे. हा कायदा कित्येक वर्षापासून सुरु असलेल्या भारतीय साक्षी पुरावा अधिनियम कायद्याची जागा घेणार आहे.
हा नवीन कायदा यशस्वी करण्यासाठी सर्व संबंधितांचे प्रयत्न व सहकार्य आवश्यक आहे. कुठल्याही कायद्याचा अर्थ कसा लावता त्यावर त्या कायद्याचे यश अवलंबून असते, असे मुंबई उच्च न्यायालयाचे न्यायमुर्ती श्रीराम मधुसूदन मोडक यांनी सांगितले.
मडगावच्या जी. आर. कारे कायदा महाविद्यालयात आयोजित "भारतीय साक्ष अधिनियम २०२३ कायद्याचे विस्तृत पैलू" या विषयावर आयोजित व्याख्यान मालेत ते बोलत होते.
याप्रसंगी त्यांनी जी. आर. कारे कायदा महाविद्यालयाच्या कार्याचा गौरव केला. या महाविद्यालयातर्फे विविध विषयांवर ज्ञानार्जन केले जाते ही चांगली गोष्ट आहे. गोव्यातील शिक्षण संस्था देशात व जगात काय घडत आहे याची दखल घेत आहे ही सुद्धा चांगली बाब आहे, असेही त्यांनी म्हटले.
याप्रसंगी विद्या विकास मंडळाचे अध्यक्ष नितीन कुंकळ्ळीकर, अॅड. प्रीतम मोराईश, अॅड. प्रसाद नाईक, कायदा महाविद्यालयाच्या विभागीय प्रमुख श्रुती नाडकर्णी हे मान्यवर उपस्थित होते.
४० महिला वकिलांचा सत्कार
द क्रोनिकल या महाविद्यालयाच्या ई वृत्तपत्राचे अनावरण यावेळी करण्यात आले. द क्रोनिकल हे ई वृत्तपत्र प्राचार्य डॉ. मारिया गोरेटी सिमोईश यांनी संपादित केले आहे. त्यामध्ये विद्यार्थ्यांच्या उपलब्धीबद्दल माहिती देण्यात येते. व्याख्यानानंतर आंतरराष्ट्रीय महिला दिन साजरा करण्यात आला. यावेळी दक्षिण गोव्यातील ४० महिला वकिलांचा सत्कार करण्यात आला.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.