काँग्रेस नेते राहुल गांधी यांच्या खासदारकीच्या अपात्रतेच्या निषेधार्थ विरोधी पक्षनेते युरी आलेमाव यांच्यासह पक्षाचे आमदार अॅड. कार्लुस फेरेरा आणि एल्टन डिकॉस्टा यांनी आज सोमवारी अधिवेशनाच्‍या पहिल्‍या दिवशी काळे कपडे परिधान करून सभागृहात प्रवेश केला.
दरम्‍यान, आलेमाव यांनी एकता, अखंडता, शांतता, सौहार्दाचा संदेश देणारी तसेच बेरोजगारी आणि महागाईवर लोकांच्या तक्रारी ऐकून घेत कन्याकुमारी ते काश्मीर अशी ‘भारत जोडो’ यात्रा यशस्वीरित्या पूर्ण केल्याबद्दल राहुल गांधी यांचे अभिनंदन करणारा अभिनंदन प्रस्ताव मांडला होता. हा प्रस्ताव सभापतींनी नामंजूर करत फेटाळून लावला.
प्रश्‍‍नोत्तराचा तास संपल्यानंतर लगेचच सभापतींनी अभिनंदनाचा प्रस्ताव घेतला तेव्हा युरी आलेमाव यांनी, देशाला एकसंध ठेवण्याच्या ध्येयाने कन्याकुमारी ते काश्मीरपर्यंत 4 हजार किलोमीटर चालणे गुन्हा आहे का? असा सवाल करुन सभापतींकडे निषेध नोंदवीला.
केपेचे आमदार एल्टन डिकॉस्टा यांनीही सभापतींना सदर प्रस्ताव दाखल करून घेण्याची विनंती केली. सत्य बोलणारे आणि भाजप सरकारचा क्रोनी कॅपिटलिस्ट अजेंडा उघड करणारे राहुल गांधी यांच्या अपात्रतेचा आम्ही तीव्र निषेध करतो. निषेधाचे प्रतीक म्हणून आम्ही तिघांनीही आज काळ्या रंगाचे कपडे परिधान केले आहेत, असे आलेमाव यांनी पत्रकारांशी बोलताना सांगितले.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
