खासगी बसेसची मालकी ‘कदंब’कडे देणार नाहीच : सुदीप ताम्हणकर

राज्यातील सर्व खासगी बसेस कदंब वाहतूक महामंडळ चालविण्यास घेणार असल्याचे मुख्यमंत्री डॉ. प्रमोद सावंत यांनी जाहीर केले. परंतु सरकारच्या या निर्णयाला खासगी बसमालक तयार नाहीत.

त्‍यांच्‍याशी कोणतीही चर्चा न करताच आपल्या मनानेच मुख्यमंत्री निर्णय घेत आहेत, अशी टीका खासगी बसमालक संघटनेचे नेते सुदीप ताम्हणकर यांनी केली.

‘गोमन्तक’ने ताम्हणकर यांच्याशी संपर्क साधला असता ते म्हणाले, राज्यात 1 हजार 460 खासगी बसेस आहेत. त्या बसेसची मालकी वेगवेगळ्या जणांकडे आहे. एवढ्या सर्वांना विश्‍वासात घेणे आवश्‍यक आहे. पण तसे करण्‍यात आलेला नाही.

टॅक्‍सीवाल्‍यांचा प्रश्‍‍न अधांतरीच असताना...

खासगी बसेस ज्या ठिकाणी जातात, तेथे कदंबच्या बसेस जात नाहीत. खासगी बसचालकांना काही प्रमाणात सवलतीही द्याव्या लागतात. त्यामुळे या बसेस आपल्या ताब्यात घेऊन त्या चालवाव्यात असा महामंडळाचा यापूर्वीपासून प्रयत्न आहे.

परंतु अगोदरच टॅक्सीवाल्यांचा प्रश्‍न सुटलेला नाही. असे असताना आता त्यात खासगी बसेस घेण्याविषयीच्या प्रश्‍नाची भर पडली आहे. त्यामुळे हे प्रकरण आता वेगळे वळण घेण्‍याची शक्‍यता नाकारता येत नाही, असे ताम्‍हणकर म्‍हणाले.