Goa Congress : हॉटेल व्यावसायिकांकडून कथित खंडणी गोळा केल्याच्या प्रकरणात जी नावे पुढे आली आहेत, त्यापैकी पाडलोस्कर हे आडनाव आता आणखी एका प्रकणात पुढे आले आहे.
बंदर कप्तान खात्याने जप्त केलेल्या होड्या काही रक्कम आकारून मूळ मालकाला देण्यात ‘पाडलोस्कर'' आडनावाच्या व्यक्तीचा सहभाग असल्याची माहिती काँग्रेस नेते एल्विस गोम्स यांनी दिली. त्यामुळे खंडणी प्रकरणात ‘पाडलोस्कर'' आडनाव पुढे आल्यामुळे आता ती हीच व्यक्ती आहे काय? असा प्रश्‍न उपस्थित होतो.
बंदर कप्तान खात्याने रेतीच्या बेकायदा व्यवसायात जप्त केलेल्या होड्यांपैकी नुकत्याच नऊ होड्या काही रक्कम आकारून सोडण्यात आल्या. त्यामुळे याप्रकरणी शहानिशा करण्यासाठी काँग्रेसचे शिष्टमंडळ खात्यातील अधिकाऱ्यांना भेटण्यासाठी गेले होते.
परंतु सध्या बंदर कप्तान खात्याचा प्रभारी पदभार असलेले अधिकारी, त्याशिवाय मरीन इनिस्पेक्टरही जागेवर नसल्याचे आढळून आले. गोम्स म्हणाले, बंदर कप्तान खात्याचे कार्यालयही लवकरच स्थलांतर होऊन ते कॅसिनो चालकांच्या ताब्यात जाणार आहे.
खात्यात कोणताही अधिकारी उपस्थित नसतो. मुख्यमंत्री या खात्याचे मंत्री आहेत, त्यांनी या खात्यावर लक्ष ठेवणे आवश्‍यक आहे, असे गोम्स म्हणाले.
माजी आमदार लवू मामलेदार म्हणाले, राज्य सरकारच्या सर्व कार्यालयांमध्ये भ्रष्टाचार सुरूच आहे.
होडीमागे एक लाख रुपये!
बंदर कप्तान खात्याने मागील काळात ज्या काही होड्या जप्त केल्या होत्या, त्या सोडण्यासाठी प्रत्येक होडीमागे एक लाख रुपये घेतले जात असल्याचा आरोप गोम्स यांनी केला.
ते म्हणाले, अशाप्रकारे नऊ होड्या सोडण्यात आलेल्या आहेत. या होड्या सोडण्यामागे ‘पाडलोस्कर'' या आडनावाची व्यक्ती असल्याचे सांगितले जाते.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.