गोव्यात मान्सूनसाठी अनुकूल परिस्थिती; हवामान खात्याने सांगितले 'या' दिवसापासून पावसाचा जोर वाढणार

Goa Weather Update : आगामी काळात ‘मान्सून सक्रीय’ होण्यासाठी परिस्थिती अनुकूल असल्याने राज्यात शनिवारी व रविवारी मुसळधार पाऊस पडण्याचा अंदाज हवामान विभागाद्वारे वर्तविण्यात आला आहे. या काळात सोसाट्याचा वारा बहुतेक भागांत धडकण्याची शक्यता असल्याचाही अंदाज वर्तविला आहे.

पावसाने पाठ फिरवल्याने राज्यातील काही धरणे कोरडी पडत आहेत. त्यामुळे आसपासच्या नागरिकांना पाणीटंचाईला सामोरे जावे लागत आहे. दरम्यान, गोव्यासह कोकण किनारपट्टी तसेच मध्य महाराष्ट्रात 23 जूनपासून पाऊस सुरु होईल. 24 आणि 25 जूनपासून पावसाचा जोर वाढेल असा अंदाज हवामान विभागाद्वारे वर्तविण्यात आला आहे.

दक्षिण गोव्यातील सांगे येथे व उत्तर गोव्यातील वाळपई येथे आज मुसळधार पाऊस पडला. आजचा पहिल्या पावसाने वाळपई अनेक ठिकाणी रस्ते पाण्याखाली गेले होते. अचानक पडलेल्या पावसामुळे अनेकांची तारांबळ उडाली. तसेच सांगे येथील बेंदवाडा पुलावर पाणी जाण्यासाठी मार्ग नसल्याने पाणी साचल्याचा प्रकार घडला.