Vijai Sardesai : स्थानिकांचा व्यवसाय परप्रांतियांच्या घशात घालण्याचे सरकारचे कारस्थान; सरदेसाईंचे सरकारवर टिकास्त्र

Vijai Sardesai : स्वतःच्या तुंबड्या भरण्यासाठी गोव्यातील भाजप सरकार गोव्यातील सर्व पारंपारिक व्यवसाय हायजॅक करून ते बाहेरच्या लोकांच्या घशात घालू पाहत आहे असे टिकास्त्र गोवा फॉरवर्डचे अध्यक्ष सरदेसाई यांनी सोडले.

या विधानसभा अधिवेशनात शॅक व्यावसायिकांच्या समस्यांवर उपाय काढता यावा यासाठी शॅक धोरणा संदर्भात लक्षवेधी सूचना मांडणार असल्याची घोषणा केली.

आज शेकमालक संघटनेच्या पदाधिकाऱ्यांनी विजय सरदेसाई यांची भेट घेऊन गोवा सरकार हे 'मॉडेल शेक' धोरण आणू पहात आहे, ते पाहिल्यास ते पारंपारिक शेकवाल्यांना विस्थापित करू पाहत आहेत अशी भिती व्यक्त केली.

यावर बोलताना सरदेसाई म्हणाले, ॲपधारीत टॅक्सी व्यवसायाच्या मार्गाने पारंपारिक टॅक्सी चालकांच्या धंद्यावर या सरकारने गदा आणली. किनारपट्टीवरील वॉटर स्पोर्टस् हा व्यवसाय त्याच प्रमाणे हे सरकार संपवू पाहत आहे आणि आता त्यांनी शॅकवाल्यांवर हात घालायचे ठरविले आहे. पारंपरिक व्यवसायांना सर्वात जास्त प्राधान्याने संरक्षण मिळण्याची गरज त्यांनी व्यक्त केली.

सरकार जे मॉडेल शॅक म्हणून काय आणू पाहते त्याचा खर्च एक कोटी रूपये असून असे चार शॅक गोव्यात ऊभे राहणार आहेत. या शॅक्सच्या पावणीत कुणीही भाग घेऊ शकते.

एव्हढ्या मोठ्या रकमेच्या लिलावात फक्तं तरांकित हॉटेलवालेच भाग घेऊ शकतील. असे मोठे स्पर्धक व्यवसायात आल्यास त्याचा मार पारंपारिक शॅक व्यावसायिकांना बसणार अशी भीती त्यांनी व्यक्त केली.

शॅक मालक संघटनेचे अध्यक्ष क्रुझ कार्दोज यांनी यावेळी बोलताना, हे धोरण आखताना सरकारने पारंपारिक शॅक्स मालकांना विश्वासात घेतलेले नाही. असे मोठे शॅक्स आल्यास ते पारंपारिक शॅकवाल्यांच्या धंदा खाणार अशी भिती त्यांनी व्यक्त केली.