Goa Casino: ‘कॅसिनोवाहू जहाजांना हंगामी परवाने कसे?’

Goa Casino: मांडवी नदीतील सहा कॅसिनोवाहू जहाजांना नांगर घालण्यास गोवा किनारी क्षेत्र व्यवस्थापन प्राधिकरणाने हंगामी ‘ना हरकत दाखला’ कसा दिला, असा प्रश्न माहिती हक्क कार्यकर्ते काशिनाथ शेटये यांनी उपस्थित केला आहे.

असा दाखला देणे हा न्यायालयाचा अवमान असून तसा खटला आपण दाखल करणार असल्याचे त्यांनी फेसबुकवर म्हटले आहे.

शेटये यांनी राष्ट्रीय हरित लवादाकडे दाद मागितली होती. कायमस्वरूपी एका जागी जहाज उभे करणे, हा सागरी अधिनियमांचा भंग होतो, असा त्यांचा दावा होता. तो लवादाने ग्राह्य मानला. त्याला कॅसिनो चालक असलेल्या कंपन्यांनी सर्वोच्च न्यायालयात आव्हान दिले आहे.

हा विषय न्यायप्रविष्ट असताना तसेच लवादाने प्रतिकूल मत व्यक्त केले असतानाही प्राधिकरण ‘ना हरकत’ दाखले कसे देऊ शकते? असे शेटये यांचे म्हणणे आहे.

आता प्राधिकरणाने स्थायी ‘ना हरकत दाखला’ देण्यासाठी कॅसिनोवाहू जहाजांची पाहणी करण्याचा निर्णय घेतला आणि हा विषय चर्चेत आला आहे. यावेळी प्राधिकरणाने हंगामी दाखले जारी केल्याची बाबही उघड झाली आहे.