Dogs In Goa: कुत्र्याने घेतला छोट्या मुलीचा चावा; मालकाविरुद्ध गुन्हा

Dog In Goa: कामुर्ली येथे एका 10 वर्षांच्या छोट्या मुलीला कुत्र्याने चावल्याप्रकरणी कोलवाळ पोलिसांनी संबंधित रॉटविलर कुत्र्याचा मालक व केअरटेकर विरोधात गुन्हा दाखल केला आहे.

पोलिसांनी दिलेल्या माहितीनुसार, रविवारी कामुर्ली येथे ही घटना घडली.

याप्रकरणी अल्पवयीन मुलीच्या वडिलांनी संशयित सिद्धार्थ खोर्जुवेकर (मालक) व अनिकेत खोर्जुवेकर (केअरटेकर) यांच्या विरोधात मानवी जीव धोक्यात आणल्याप्रकरणी तक्रार दाखल केली.

पोलिसांनी सांगितले की, मालकाने कुत्रा सांभाळण्यासाठी त्याच्या भावाकडे सोपवले होते. मात्र, त्यांनी कुत्र्याला सोडले व त्याच्यावर लक्ष ठेवले नाही.

परिणामी, कुत्रा घराबाहेर गेला व त्याने दहा वर्षांच्या अल्पवयीन मुलीचा चावा घेतल्याने तिला रक्तस्राव झाला.

याप्रकरणी कोलवाळ पोलिसांनी मालक व केअरटेकरविरुद्ध गुन्हा नोंदविला आहे. सिद्धार्थ आणि अनिकेत हे दोघे सख्खे भाऊ आहेत.

कामुर्ली येथे दोघेही स्वतंत्र राहतात. त्यांच्या मालकीचा रॉटविलर कुत्रा आहे. पैकी अनिकेत हा या कुत्र्याचा केअरटेकर आहे.

रविवारी दुपारी पावणेबाराच्या सुमारास सिद्धार्थ आणि अनिकेत यांनी या कुत्र्याला मोकळे सोडले होते.