Goa Crime News: गणेशपुरी हल्ल्यातील जखमीचा मृत्यू; संशयित सहाजणांवर सदोष मनुष्यवधाचा गुन्हा दाखल

Goa Crime News: गणेशपुरी-म्हापसा येथे लोखंडी सळीच्या हल्ल्यात जबर जखमी झालेल्या अहमद देवडी (३०, म्हापसा) या युवकाचा मंगळवारी (ता.१८) उपचारादरम्यान गोमेकॉत मृत्यू झाला. तब्बल १८ दिवसांपासून मृत्यूशी सुरू असलेली त्याची झुंज अखेर अपयशी ठरली. याप्रकरणी संशयितांविरोधात भादंसंच्या ३०२ कलमाखाली सदोष मनुष्यवधाचा गुन्हा दाखल केला आहे.

दरम्यान, या प्रकरणातील फरार संशयित आरके तसेच इतरांना जोपर्यंत अटक होत नाही, तोपर्यंत आम्ही अहमदचा मृतदेह ताब्यात घेणार नाही, असा पवित्रा देवडीच्या कुटुंबीयांनी घेतला आहे. ही प्राणघातक हल्ल्याची घटना गणेशपुरी येथील ओव्हरहेड टाकीजवळ (ता.३० मे) पहाटे ३ वा.च्या दरम्यान घडली होती. आतापर्यंत म्हापसा (Mapusa) पोलिसांनी सहाजणांना अटक केली आहे.

काहीजण फरार, काहीजण कोठडीत

वैयक्तिक रागातून हा मारहाणीचा प्रकार घडल्याचे पोलिसांकडून सांगण्यात आले होते. या प्रकरणातील रामकृष्ण भालेकर ऊर्फ आरके तसेच इतर संशयित अद्याप फरार आहेत. तर पोलिसांनी आतापर्यंत मंथन च्यारी, श्रीधर किल्लेदार, अभिषेक पुजारी (म्हापसा) यांना ३० मे रोजी अटक केली होती. हे संशयित सध्या न्यायालयीन कोठडीत आहेत. तर, शरणबासू गायकवाड, नागराज पुजारी व बोरेश पुजारी यांना ६ जून रोजी अटक केली. हे संशयित सध्या पोलिस कोठडीत आहेत.