Goa Shacks: नुकसान भरपाई मागणीवरून शॅकमालकांत पडले दोन गट

Goa Shacks: ऑल गोवा शॅक ओनर्स असोसिएशन या व्यवसायात झालेल्‍या दोन महिन्‍यांच्‍या नुकसान भरपाईची मागणी पर्यटन विभागाकडे लवकरच करणार आहे. मात्र या प्रश्‍‍नावरून राज्‍यातील शॅकमालकांमध्ये फूट पडली आहे.

याबाबत ऑल गोवा शॅक ओनर्स असोसिएशनचे अध्यक्ष क्रुझ कार्दोझ यांच्याशी संपर्क साधला असता ते म्हणाले की, ऑक्टोबर आणि नोव्हेंबर या दोन महिन्यांच्या विलंबानंतर आता शॅक उभारण्यात आले आहेत.

मात्र पर्यटन हंगामातील दोन महत्त्‍वपूर्ण महिने वाया गेले. त्‍यामुळे आमचे प्रचंड नुकसान झाले आहे. ही भरपाई मिळावी यासाठी लवकरच पर्यटन विभागाला निवेदन देण्‍यात येईल.

तर, गोवा पारंपरिक शॅकमालक संघटनेचे नेते मान्यूएल कुलासो यांनी सांगितले की, उत्तर गोव्‍यात बहुतांश किनाऱ्यांवर शॅकची उभारणी करण्‍यात आलेली आहे.

चक्रीवादळामुळे प्रभावित झालेल्या लोकांना सरकारने अद्याप नुकसान भरपाई दिलेली नाही. त्‍यामुळे शॅकमालकांनी पर्यटन विभागाकडून नुकसान भरपाई मागणे म्‍हणजे माझ्या मते वेळेचा अपव्यय आहे.