Altinho Road Repair: आल्तिनो जॉगर्स पार्क रस्त्याची होणार तात्पुरती डागडुजी; महापालिकेने झटकलेली जबाबदारी पीडब्ल्यूडीकडे

पणजी: स्‍मार्ट सिटी योजनेअंतर्गत करण्यात आलेल्या कामांच्या ठिकाणी रस्त्यांची डागडुजी स्मार्ट सिटीतर्फे करण्यात येतील मात्र या योजनेत नसलेल्या रस्त्यांची डागडुजी करण्याचे काम पणजी महापालिकेचे आहे असे सरकारने स्पष्ट केले होते. महापालिकेला रस्त्यांची डागडुजी करणे शक्य नसल्याने ती पीडब्ल्यूडीमार्फत करण्याची विनंती केली आहे. त्यामुळे आल्तिनो येथील जॉगर्स पार्ककडील रस्त्यांची येत्या १५ दिवसांत तात्पुरती डागडुजी केली जाईल, अशी माहिती आज ॲडव्होकेट जनरल यांनी स्मार्ट सिटीसंदर्भातच्या याचिकेवरील सुनावणीवेळी दिली.

आल्तिनो - पणजी येथील जॉगर्स पार्क व आझाद मैदान येथील पोलिस मुख्यालयासमोरील रस्त्याच्या डागडुजीची जबाबदारी ही पणजी महापालिकेची आहे, असे ‘पणजी स्मार्ट सिटी’ने स्पष्ट केले होते मात्र महापालिकेने जॉगर्स पार्कची डागडुजी पीडब्ल्यूडी करत असल्याचे सांगून आपल्यावरील जबाबदारी झटकली होती.

त्यामुळे या रस्त्याच्या कामावरून असलेल्या संभ्रमामुळे गोवा खंडपीठाने सुनावणी आज ठेवून हे काम कोण करणार, याची माहिती महापालिकेकडे मागितली होती. त्यानुसार महापालिकेने पीडब्ल्यूडीला पत्र पाठवून हे काम करण्याची विनंती केली आहे. त्यामुळे त्यांनी मागील सुनावणीवेळी हे काम पीडब्ल्यूडीचे आहे अशी खोटी माहिती खंडपीठाला दिली होती. हे काम पीडब्ल्यूडी करण्यास तयार आहे असे ॲडव्होकेट जनरल देविदास पांगम यांनी खंडपीठाला सांगितले.

पणजीतील ११ पैकी ८ परिसरातील रस्त्यांच्या डागडुजीची जबाबदारी पणजी स्मार्ट सिटीची आहे. या रस्त्यांची तात्पुरती डागडुजी येत्या १५ दिवसांत केली जाईल त्यात रायबंदर येथील रस्त्याचाही समावेश असेल. मात्र हे काम पडणाऱ्या पावसावर अवलंबून असेल. आझाद मैदान येथील पोलिस मुख्यालयासमोरील रस्त्याची डागडुजी स्मार्ट सिटीने डांबरीकरण करून केली होती. मात्र, पावसाळ्यापूर्वी पणजी महापालिकेने मलनिस्सारण गटाराचे काम करण्यासाठी हा रस्ता खोदला होता. त्यामुळे त्याची डागडुजी पणजी महापालिकेने करायला हवी, अशी भूमिका सरकारने घेतली होती.