Goa Crime: जनतेसह राज्यातील मंदिरेही असुरक्षित

Goa Crime राज्यात गेले कित्येक दिवस चोऱ्या, लुटमारीचे प्रकार दिवसाढवळ्या घडत आहेत. झुआरीनगरमध्ये चोरांनी थेट पोलिसांवरच गोळीबार केला. मंगळवारी तर रात्री दोन मंदिरे फोडून तेथील ऐवज चोरण्यापर्यंत चोरांची मजल गेली.

लाडफे येथील मंदिरफोडीची घटना ताजी असतानाच, पंचायत क्षेत्रातील कासारपाल येथील अन्य एक मंदिर चोरांनी फोडले. मंगळवारी मध्यरात्री कासारपाल येथील श्री सातेरी भूमिका देवीचे मंदिर फोडून फंडपेटीतील 12 हजारांची रोकड चोरांनी लंपास केली.

रविवारी (ता.21) अज्ञात चोरांनी लाडफे येथील श्री महादेव मंदिरातील फंडपेटी फोडली होती. याचा तपास सुरू असतानाच, मंगळवारी कासारपाल येथील मंदिरात चोरी झाली.

आज, बुधवारी सकाळी हा प्रकार पुजाऱ्याच्या लक्षात येताच देवस्थानतर्फे पोलिसांत तक्रार करण्यात आली. पोलिसांनी घटनास्थळी जाऊन पंचनामा केला.

याप्रकरणी डिचोली पोलिस तपास करत आहेत. दरम्यान, साकवाळ येथील गोळीबारप्रकरणी पोलिसांनी दोन्ही संशयितांचे रेखाचित्र जारी केले आहे.