सरकार मराठी, कोकणी माध्यमाच्या प्राथमिक शाळा चालवते. त्या शाळा चालतात, बंद पडतात त्यावरून कोणत्या भाषेचे किती विद्यार्थी याचे मोजमाप केले जाते. प्रत्यक्षात मात्र मराठी, कोकणी शाळेत शिकणारी मुले ही अन्य भाषक असतात.
मुख्यमंत्री वसिष्ठ गुरु पुरस्कार विजेत्या शिक्षिकेने हे सत्य उघड केले आहे. या पुरस्कारांची घोषणा आज होणार होती, त्यासाठी पुरस्कार विजेत्यांना पर्वरी येथील शिक्षण संचालनालयात पाचारण करण्यात आले होते.
तेथे दै. ‘गोमन्तक’शी बोलताना ए. व्ही. लॉरेन्को - मडगाव येथील सरकारी प्राथमिक शाळेतील शिक्षिका सोनिया माणगावकर यांनी ही वस्तुस्थिती सांगितली.
त्यांनी सांगितले, ग्रामीण भागात प्राथमिक शिक्षक म्हणून आपण काम केले आहे. मडगाव शहरात बदली झाली आणि वेगळेच चित्र पाहायला मिळाले. मराठी कोकणी माध्यमाच्या शाळेत शिकणारी मुले या दोन्ही भाषा बोलणारी नाहीत.
ती मुले कन्नडसह इतर भाषा बोलतात. त्यांचे पालक परप्रांतीय आहेत. त्या मुलांना हिंदीतून शिकवण्याशिवाय पर्याय नसतो. त्यामुळे त्यांना हिंदीतूनच शिकवावे लागते.
याशिवाय शाळेत मुले का पाठवली पाहिजेत हेही पालकांना समजत नाही. ते निरक्षर आहेत. त्या मुलांना शाळेत पाठवा म्हणून झोपडपट्टी गाठावी लागते.
वर्गपाठ आणि गृहपाठ शाळेतच
शाळा व घर यात मुलांच्या दृष्टीने मोठे अंतर असते. घरी गेल्यावर ती मुले विद्यार्थी नसतातच. ती मुले गृहपाठ करत नाहीत. त्यामुळे अशा मुलांचा वर्गपाठ आणि गृहपाठ शाळेतच करून घ्यावा लागतो. त्यातही संवादासाठी भाषेची अडचण मोठी असते.
हिंदीचा वापर करून कसेबसे समजवावे लागते. कधी कधी त्यांना हिंदीतूनही समजावणे कठीण होते. कारण त्यांची ती भाषा नव्हे. त्यांच्या भाषा आम्हाला येत नाहीत. त्यामुळे त्यांना समजतील अशा सोप्या शब्दांचा वापर करून शिकवावे लागते, असे शिक्षिका सोनिया माणगावकर यांनी सांगितले.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.