Taxi driver manhandled by PI near Peddem Mapusa Protests Erupt
म्हापसा: पेडे-म्हापसा येथे अपघातस्थळी एका पोलिस उपनिरीक्षकाने टॅक्सीचालकाची गळपट्टी (कॉलर) पकडून त्याला जबरदस्तीने पोलिस जीपमध्ये डांबले, असा आरोप करीत मोपा तसेच इतर ठिकाणच्या टॅक्सीचालकांनी मंगळवारी रात्री उशिरा म्हापसा पोलिस स्थानकावर मोठी गर्दी केली. संबंधित उपनिरीक्षकाला निलंबित करण्याची मागणी त्यांनी केली. त्यामुळे पोलिस स्थानक परिसरात बराच वेळ तणावाचे वातावरण निर्माण झाले होते.
याप्रश्‍नी चेतन कामत म्हणाले, अलीकडे पोलिसांकडून टॅक्सीचालकांना लक्ष्य करण्याचे प्रकार वाढले आहेत; परंतु आम्ही पोलिसांची दादागिरी खपवून घेणार नाही. सरकार आणि गृह खाते अशा काही मुजोर पोलिसांना पाठीशी घालत आहे. पोलिसांनी हे प्रकरण अदखलपात्र गुन्हा म्हणून नोंद करावे, अशी मागणी त्यांनी केली.
यावेळी जमावाने संबंधित पोलिस उपनिरीक्षकाने टॅक्सीचालकाची माफी मागावी, असा पवित्रा घेतला. मात्र, पोलिसांनी तसे जमणार नाही, असे स्पष्ट सांगितले. तुम्हाला हवे असल्यास लेखी तक्रार द्या, तक्रारीची योग्य दखल घेऊ, असे पोलिसांनी सुनावले. त्यानुसार टॅक्सीचालकांनी लेखी तक्रार देऊन कारवाईची मागणी केली.
टॅक्सीचालकांच्या दाव्यानुसार, घटनेवेळी पोलिस उपनिरीक्षकाने युनिफॉर्म परिधान केला नव्हता. तसेच त्याची मद्यपान चाचणी करावी, अशी मागणी करत त्यांनी ‘आम्हाला न्याय हवा’ अशा घोषणा दिल्या. यावेळी अल्कोमीटरने उपनिरीक्षकाची तपासणी केली असता, त्याची चाचणी निगेटिव्ह आली.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.