Goa Crime: पारोडा खून प्रकरणी संशयिताला 48 तासांमध्ये अटक

Goa Crime: पारोडा-केपे येथे एका बिहारी कामगाराचा खून करून नंतर उत्तर प्रदेशमध्ये पळून जाण्याचा प्रयत्न करणारा संशयित प्रदीप यादव याला केपे पोलिसांनी पाठलाग करून अवघ्या ४८ तासांत जेरबंद केले.

दक्षिण गोवा पोलिस अधीक्षक अभिषेक धानिया यांनी दिलेल्या माहितीनुसार, मृत कामगाराचे नाव अर्जुन शर्मा (25, बिहार) असे असून सोमवार, 13 मार्च रोजी त्याचा मृतदेह पारोडा येथे आडवाटेवर सापडला होता.

त्याच्या डोक्यावर फावड्याने वार केल्याने त्याचे निधन झाले होते. हे सर्व कामगार रस्त्याचे काम करत होते.

मोबाईल चोरण्याच्या उद्देशाने खून-

अर्जुन शर्मा याचा मोबाईल फोन चोरण्याच्या उद्देशानेच प्रदीप यादवकडून हा खून करण्यात आल्याची माहिती धानिया यांनी दिली.

धानिया यांच्या मार्गदर्शनाखाली निरीक्षक दीपक पेडणेकर यांनी उपनिरीक्षक शिवराम गावस, महिला उपनिरीक्षक वेरोनिका कुतिन्हो व इतरांच्या साहाय्याने या प्रकरणाचा यशस्वी तपास लावला.

म्हणून संशय बळावला...

या कामगारांमधील संशयित प्रदीप यादव हा अकस्मात गायब झाल्याने पोलिसांचा त्याच्यावरील संशय बळावला. सॅटेलाईटद्वारे संशयिताच्या हालचालींचा माग घेतला असता तो उत्तर प्रदेशच्या दिशेने ट्रेनमधून जात असल्याचे पोलिसांना कळून आले.

ही माहिती मिळाल्यावर उपनिरीक्षक शिवराम गावस यांच्या नेतृत्वाखाली एक पथक तातडीने उत्तर प्रदेशला पाठविण्यात आले. पोलिस त्याचा माग काढत काढत उत्तर प्रदेशमधील खुशीनगर येथे पोहोचले, जो संशयिताचा गाव होता. या गावांतील कासिया येथील बस स्टॉपवर त्याला पकडण्यात आले.