कुंकळ्ळी परिसरातील प्रकल्पाची पाहणी: युरींकडून काही सूचना

कुंकळ्ळी: आमदार युरी आलेमाव यांनी कुंकळ्ळी पालिका क्षेत्रातील दूरवस्था झालेल्या सरकारी प्रकल्पाची पाहणी करून परिस्थितीचा आढावा घेतला. त्यांच्या बरोबर पालिकेचे अध्यक्ष लक्ष्मण नाईक, पालिका अभियंते विनय देसाई, सहायक अभियंते वेळीप, नगरसेवक व पालिका अधिकारी उपस्थित होते.

आलेमाव यांनी स्वातंत्रसैनिक स्मारक, कुंकळ्ळी बसस्थानक, कुंकळ्ळी बाजार प्रकल्प, माडीकटा क्रीडा प्रकल्प व माडीकटा जॉगर्क पार्कची पाहणी केली.

स्मारकाची व इतर सरकारी प्रकल्पाची जी दूरवस्था झाली, त्याला कुंकळळीचे प्रतिनिधित्व करणारे आमदार व स्थानिक लोक प्रतिनिधींची निष्काळजी पणा जबाबदार असल्याचा आरोप आमदार आलेमाव यांनीकेला.कुंकळ्ळीतील स्वातंत्र्यसैनिकांच्या स्मारकाबरोबरच सभागृहाची दुरुस्ती करणे,वातानुकूलन व्यवस्था बसविण्यासंदर्भात नियोजन करण्याची सूचना आलेमाव यांनी केली.आलेमाव म्हणाले, जिथे विकासाची गाडी ज्योकीम आलेमाव यांनी सोडली होती, तिथून आपण पुढे सुरू करणार आहे.