पंचायत निवडणुकीनंतर नव्याने भूमिगत वीजवाहिनीची निविदा

पणजी : राज्यात भूमिगत वीजवाहिनी घालण्याचे काम सुरू झाले होते. परंतु, ही वाहिनी घालण्याचा खर्च 30 ते 40 टक्क्यांनी वाढल्याने कंत्राटदार काम करत नाही. पंचायत निवडणुका झाल्यानंतर नव्याने निविदा काढण्यात येतील, अशी माहिती वीजमंत्री सुदिन ढवळीकर यांनी आज विधानसभेत दिली. हळदोणेचे आमदार ॲड. कार्लुस फरेरा यांनी मांडलेल्या लक्षवेधी सूचनेवर ते बोलत होते.

साळगावचे आमदार केदार नाईक यांनी सांगितले की, आपल्या मतदारसंघात भूमिगत वीजवाहिनी घालण्याचे 90 कोटी रुपयांचे काम मंजूर झाले आहे. परंतु, कंत्राटदार काम सुरू करत नसल्याचे मंत्र्यांच्या नजरेस आणून दिले होते. यासंदर्भात ढवळीकर यांनी, ही समस्या संपूर्ण राज्यभरात असल्याचे सांगितले. पंचायत निवडणुकीनंतर याचे निवारण केले जाणार असल्याचे ते म्हणाले.

ॲड. फरेरा यांनी हळदोणे वीजपुरवठा खंडित होण्याचा प्रकार आणि येथे 150 ट्रान्सफॉर्मर एका कनिष्ठ अभियंत्याच्या निरीक्षणाखील येतात. तसेच, कर्मचाऱ्यांना अभाव असल्याने पुरवठा सुरळीत करताना वेळ जातो. त्यासाठी अतिरिक्त अभियंता आणि कर्मचाऱ्यांची मागणी त्यांनी केली होती. ही मागणी मंत्र्यांनी मान्य केली.

शिवोलीच्या आमदार दिलायला लोबो म्हणाल्या की, शिवोली मतदारसंघाला वीज उपकेंद्र म्हापशाचे होते. परंतु, आता ते पेडणेचे दिले आहे. त्यामुळे पुरवठा खंडित झाल्यास वीज कर्मचारी पेडणेतील काम पूर्ण करून अखेर शिवोली येथे येतात. त्यासाठी आम्हाला पुन्हा एकदा म्हापसा उपकेंद्र द्यावे, अशी मागणी त्यांनी केली. यावर विचार करू, अशी ग्वाही ढवळीकर यांनी दिली.