गोवा म्हटलं की प्रामुख्याने पर्यटन ठिकाण अशीच प्रतिमा समोर येते मग प्रसिद्ध बीच, निसर्गसौंदर्य आणि सीफूड यांचाही प्राधान्याने उल्लेख होतो. गोव्यात भात शेती मोठ्या प्रमाणावर केली जाते. खाण क्षेत्र आणि समुद्राच्या पाण्यामुळे होणारी खारफुटी यामुळे इतर पिकांना पोषक वातावरण मिळत नाही.
पण, कधीकाळी खाण क्षेत्र असलेल्या नेत्रावळी येथील वेर्ले गाव्यात चक्क स्ट्रॉबेरीचे उत्पादन घेतले जात आहे. यातून शेतकऱ्यांनी चांगेल उत्पन्न मिळत असून, शेतकऱ्यांची यशोगाथा खुद्द मुख्यमंत्री प्रमोद सावंत यांनी शेअर केली आहे.
मुख्यमंत्री प्रमोद सावंत यांनी वेर्ले गावात स्ट्रॉबेरीचे उत्पादन घेणाऱ्या शेतकऱ्यांची यशोगाथा शेअर केली आहे. आत्मनिर्भर भारत, स्वयंपूर्ण गोवा अभियानाचा एक भाग आणि स्वयंपूर्ण मित्रांच्या मदत व अटल ग्राम विकास एजन्सीच्या सहकार्याने या शेतकऱ्यांनी स्ट्रॉबेरी लागवड केलीय.
सातारा जिल्ह्यातील महाबळेश्वर येथून सुरुवातीला 33,000 सॅपलिंग्ज आणले, शेतकऱ्यांना प्रत्यक्ष शेतावर घेऊन जात प्रशिक्षण देण्यात आले. वेर्ले गावातील जवळपास 40 ते 50 घरांतील लोकांना या स्ट्रॉबेरीच्या उत्पादनातून चांगले आर्थिक उत्पन्न मिळत असल्याची माहिती मुख्यमंत्री प्रमोद सावंत यांनी दिली.
व्हिडिओत शेतकऱ्यांनी दिलेल्या माहितीनुसार, स्ट्रॉबेरीच्या शेतीसाठी दीड किलोमीटर अंतरावरुन पाणी आणले आहे. आत्मनिर्भर भारत, स्वयंपूर्ण गोवा अभियानाच्या अंतर्गत अटल ग्राम विकास एजन्सीचा चांगला फायद्या झाल्याची प्रतिक्रिया शेतकऱ्यांनी व्यक्त केली.
स्ट्रॉबेरी शेतीतून चार ते साडेचार हजार युनिट उत्पादन होण्याची शक्यता असून, 6 ते 7 लाख रुपयांचे आर्थिक उत्पन्न मिळेल, असा अंदाज शेतकऱ्यांनी व्यक्त केला.
स्वयंपूर्ण गोवा अभियानाचा गावातील शेतकऱ्यांना मोठ्या प्रमाणावर फायदा झाला आहे. अशा पद्धतीने सरकारने योजना राबविल्यास सर्वसामान्य लोक स्वयंपूर्ण होतील, असा आशावाद शेतकऱ्यांनी व्यक्त केला.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.