सुभाष फळदेसाईंचा उपसभापतीपदाचा राजीनामा

पणजी : सांगेचे भाजपचे आमदार सुभाष फळदेसाई यांनी विधानसभेच्या उपसभापतीपदाचा राजीनामा दिला आहे. फळदेसाई यांची गोवा मंत्रिमंडळाच्या विस्तारात वर्णी लागल्याने त्यांना आपलं पद सोडावं लागलं होतं. नुकतीच त्यांची उपसभापतीपदी निवड झाली होती.

गोवा विधानसभेच्या उपसभापतीपदी सांगेचे भाजप आमदार सुभाष फळदेसाई यांची निवड झाली होती. फळदेसाई यांना 24 तर काँग्रेसचे आमदार केदार नाईक यांना 15 जणांनी पाठिंबा दिला. सभापतीपदासाठी रमेश तवडकर यांची निवड झाल्यानंतर उपसभापती पदासाठी भाजपतर्फे आमदार सुभाष फळदेसाई आणि अपक्ष आमदार आलेक्स रेजिनाल्ड यांनी तर काँग्रेसतर्फे आमदार केदार नाईक यांनी अर्ज दाखल केले होते.

प्रमोद सावंत सरकारचा मंत्रिमंडळ विस्तार आज म्हणजेच शनिवारी निश्‍चित झाला असून त्यात मगोपच्या सुदिन ढवळीकर (Sudin Dhavalikar) यांच्यासह सांगेचे भाजपचे आमदार सुभाष फळदेसाई आणि थिवीचे आमदार नीळकंठ हळर्णकर यांचे मंत्रिपद निश्‍चित झाले आहे. सुभाष फळदेसाई हे विधानसभेचे उपसभापती असल्याने त्यांना राजीनामा द्यावा लागला आहे.

मंत्रिमंडळ विस्तारानंतर लगेच खातेवाटप करण्याची शक्यता मुख्यमंत्री प्रमोद सावंत (Pramod Sawant) यांनी यापूर्वीच व्यक्त केली आहे. त्यानुसार उद्या (रविवारी) खातेवाटप होईल. यापूर्वी रोहन खंवटे यांना मंत्रिमंडळात घेतल्याने हळर्णकर हे बार्देशचे दुसरे भाजप (BJP) नेते आहेत. सुदिन ढवळीकर यांना मंत्रिमंडळात घेतल्याने फोंडा तालुक्यात चार मंत्री होणार असले, तरी मगोपच्या प्रस्तावानुसार ढवळीकर यांना मंत्रिपद देण्यात येत आहे. शनिवारी दुपारी 12 वाजता राजभवन परिसरात नव्याने उभारलेल्या दरबार हॉलमध्ये राज्यपाल पी.एस. श्रीधरन पिल्लई या तीन मंत्र्यांना पद आणि गोपनीयतेची शपथ देतील.