पणजी: गोवा विधानसभेच्या उपसभापतीपदी सांगेचे भाजप आमदार सुभाष फळदेसाई यांची निवड झाली. त्यांना 24 तर काँग्रेसचे आमदार केदार नाईक यांना 15 जणांनी पाठिंबा दिला. काल दुपारच्या सत्रात ही निवडणूक घेण्यात आली. मुख्यमंत्री व विरोधी पक्षातील सभागृहाचे ज्येष्ठ आमदार दिगंबर कामत यांनी त्यांना उपसभापतीच्या आसनावर नेऊन बसविले.
मंगळवारी सभापतीपदासाठी रमेश तवडकर यांची निवड झाल्यानंतर उपसभापती पदासाठी भाजपतर्फे आमदार सुभाष फळदेसाई व अपक्ष आमदार आलेक्स रेजिनाल्ड यांनी तर काँग्रेसतर्फे आमदार केदार नाईक यांनी अर्ज दाखल केले होते.
मात्र, आमदार आलेक्स रेजिनाल्ड यांनी अर्ज मागे घेतल्याने या पदासाठी दोन आमदारांमध्ये निवडणूक झाली. भाजप आघाडी सरकारकडे स्पष्ट बहुमत असल्याने सुभाष फळदेसाई यांची निवड अपेक्षित होती.मंत्रिपदासाठी शर्यतीत असलेले दक्षिण गोव्याचे भाजप आमदार रमेश तवडकर व आमदार सुभाष फळदेसाई यांची सभापती व उपसभापतीसाठी निवड झाल्याने सरकारला पाठिंबा दिलेल्या आमदार आलेक्स रेजिनाल्ड यांना मंत्रिपद मिळण्याची शक्यता आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
