समुद्रात सेल्फी काढताना म्हैसूरचा विद्यार्थी बुडाला

कळंगुट : सिक्केरी समुद्रात सेल्फी काढताना मंगळवारी आणखी एक विद्यार्थी बुडाला. सहा दिवसांतील ही दुसरी घटना आहे.

सिक्केरी समुद्र किनाऱ्यावर मंगळवारी दुपारी म्हैसूरहून पर्यटनासाठी आलेल्या आठजणांच्या विद्यार्थ्यांच्या गटातील योहान नामक तरुण सेल्फीच्या नादात खडकावरून पाय घसरून पाण्यात पडून बेपत्ता झाला आहे.

दृष्टी या जीवरक्षक संस्थेच्या कामगारांनी बेपत्ता योहानचा रात्री उशिरापर्यंत शोध घेण्याचा प्रयत्न केला. मात्र, समुद्रात उसळणाऱ्या जोरदार लाटांमुळे त्यांच्या प्रयत्नांना यश मिळाले नव्हते. रात्री उशिरापर्यंत शोध घेऊनही योहानचा पत्ता लागू शकला नाही.

गेल्या 8 जूनला अशाचप्रकारे केरळ येथील अभियांत्रिकी महाविद्यालयाच्या निर्मल साजू या विद्यार्थ्यांचा सिक्केरी येथील समुद्रात सेल्फी घेताना पडून मृत्यू झाला होता.