Goa : वजनमाप खात्याची धडक कारवाई; 44 ठिकाणी छापे

Goa : गणेशोत्सव सणाच्या पार्श्‍वभूमीवर राज्यातील विविध भागात विक्री करण्यात येत असलेल्या दुकानांमधील पॅकेज्ड वस्तूंवर नियमांनुसार सविस्तर माहिती नसल्याने वजनमापे खात्याच्या विविध पथकांनी कारवाई मोहीम सुरू केली आहे. रविवार सुट्टीचा दिवस असूनही खात्याच्या अधिकाऱ्यांनी 44 ठिकाणी एकाचवेळी विविध ठिकाणी कारवाई केली. त्यामध्ये २३ पॅकेज्ड तर 20 नियमांचे उल्लंघन केलेल्या प्रकरणांचा समावेश आहे.

काही पॅकेज्ड खाद्यपदार्थांच्या पाकिटांवर उत्पादनाची तारीख, उत्पादन करणाऱ्याचे नाव तसेच ते किती दिवस खाण्यास योग्य याची माहिती नमूद केलेली नसते तर काही खाद्यपदार्थावरील पाकिटावर वजनापेक्षा प्रत्यक्षात वजन कमी असते. दक्षिण गोवाचे वजनमापे अधिकारी भूपेंद्र देसाई, आझेन रॉड्रिग्ज, विकास कांदोळकर यांनी नितीन पुरुषन यांच्या मार्गदर्शनाखाली हे छापे टाकले.

‘जागो ग्राहक जागो’

गणेशोत्सवानिमित्त बाजारपेठांमध्ये खाद्यपदार्थ तसेच गृहोपयोगी वस्तू आल्या आहेत. या वस्तू खरेदी करताना प्रत्येक ग्राहकाने सतर्क राहण्याची गरज आहे. खाद्यपदार्थ पाकिटावर नमूद करण्यात आलेल्या वजनापेक्षा अनेकदा त्याचे वजन कमी असते तर गृहोपयोगी वस्तू खरेदी करताना पॅकेज्ड वस्तूच्या बॉक्सवर कंपनीचे नाव, उप्तादन तारीख, किरकोळ किंमत याची माहिती नसते. अशी तफावत जर खरेदी करताना आढळून आल्यास ग्राहकांनी जागृत व्हावे असे आवाहन खात्याच्या नियंत्रक प्रसाद शिरोडकर यांनी केले आहे.

डिचोली, सत्तरीतही मोहीम

1 पेडणे, बार्देश, डिचोली व सत्तरी या तालुक्यांमध्ये 18 दुकानधारकांवर कारवाई करण्यात आली. त्यामध्ये 13 प्रकरणे पॅकेज्ड तर 5 ही वजनमापेमध्ये तफावत असलेली होती. ही कारवाई वजनमापे अधिकारी राजेश वेंगुर्लेकर, सिद्धेश शिरगावकर, केशवराज गोवेकर, आदित्य परब यांनी सहाय्यक नियंत्रक गुलाम गुलबर्ग यांच्या मार्गदर्शनाखाली ही कारवाई केली.

2 तिसवाडी व फोंडा तालुक्यात 11 ठिकाणी कारवाई केली त्यामध्ये 7 पॅकेज्ड तर 4 वजनमापेमध्ये तफावर असलेली प्रकरणे होती. अधिकारी रजत कारापूरकर, विकास कांदोळकर यांनी सहाय्यक नियंत्रक देमू मापारी यांच्या मार्गदर्शनाखाली ही कारवाई केली.