Panjim Stray Dogs Case: पणजीत भटक्या कुत्र्यांच्या संख्येत होतेय वाढ; नागरिकांना त्रास

Stray Dogs are Increasing in Panjim: देशात आणि राज्यात भटक्या कुत्र्यांच्या संख्येत दिवसेंदिवस वाढ होत असून त्यांच्यावर नियंत्रण आणणे कठीण होत चालले आहे.

वाढते शहरीकरण, अन्नाची नासाडी, कचरा आदी कारणांमुळे या कुत्र्यांची संख्या वाढत आहे.

पणजी शहरात एकट्याने पायी चालणे, रत्यावरून दुचाकी घेऊन जाणे कठीण होत असून स्थानिक प्रशासनाने प्रामुख्याने महानगरपालिकेने यासंबंधी गांभीर्याने पावले उचलणे व योग्य निर्णय घेत सार्वजनिक ठिकाणी कचरा टाकण्यास प्रतिबंध करून मोठ्या प्रमाणात दंड आकारणे गरजेचे आहे.

गोव्यातील भटक्या कुत्र्यांची संख्या अंदाजे 71 हजार 590 इतकी आहे. यासोबत दिवसेंदिवस त्यांच्या संख्येत वाढ होत आहे. या भटक्या कुत्र्यांच्या बाढत्या संख्येमुळे शहर आणि ग्रामीण भागातील नागरिकांना अनेक समस्यांना सामोरे जावे लागते.

भटक्या कुत्र्यांनी चावा घेणे, रस्त्यात आडवी येऊन अपघात घडणे अशा घटना घडतात. प्रशासनाने या विषयाकडे गांभीर्याने लक्ष द्यावे, अशी सर्वसामान्य नागरिकांची मागणी आहे.

गोवा एकमेव रेबिजमुक्त राज्य

गोवा हे देशातील एकमेव राज्य आहे जे ‘रेबिजमुक्त’ आहे. असे असले तरी रेबिजमुक्त असण्याचा रिकोर्ड सांभाळण्यासाठी भटकी कुत्री नियंत्रणात येणे तसेच मोठ्या प्रमाणात लसिकरण होणे गरजेचे आहे.

श्‍वानांच्या वाढीची कारणे

अनेकांच्या घरातील शिळे अन्न, उरलेले अन्न हे रस्त्याच्या बाजूला, कचऱ्याच्या ढिगाऱ्यात, मोकळ्या जागेत टाकले जाते. हे अन्न भटके श्‍वान खात असतात. त्यावर त्यांचा उदरनिर्वाह चालतो. त्यामुळे अशा उघड्यावर अन्न टाकण्यास प्रामुख्याने बंदी घातली पाहिजे.

"पणजी महापालिका क्षेत्रात मोठ्या प्रमाणात भटक्या कुत्र्यांचा सुळसुळाट झालेला असून त्याचा त्रास नागरिकांना होत आहे. दुचाकीवरून जाताना अचानक रस्त्यात आल्याने अपघात होतात व श्‍वान चावा घेतात. वाढत्या श्‍वानांच्या संख्येवर पणजी महापालिकेने गांभीर्याने लक्ष देणे गरजेचे आहे."

भरत पोवार, स्थानिक नागरिक