जनतेला 'महागाई' कमी झालेली पाहायची असेल तर भाजपला घरी पाठवा..

Goa Politics : सांत आंद्रेचे आमदार फ्रान्सिस सिल्वेरा विधानसभेत (Assembly) स्थानिक प्रश्न मांडण्यात अपयशी ठरले आहे. त्यांनी केलेल्या पक्षांतराच्या प्रवृत्तीपासून या मतदारसंघाला (Constituency) मुक्त करण्याची गरज आहे. जनतेला महागाई कमी झालेली पाहायची असेल तर भाजपला घरी पाठवणे अत्यंत आवश्यक आहे आणि हाच लोकांसमोर पर्याय आहे असे प्रतिपादन गोवा फॉरवर्ड (Goa Forrward) पक्षाचे अध्यक्ष विजय सरदेसाई (Vijay Sardesai) यांनी केले.

सांत आंद्रेचे नेते जगदीश भोबे यांच्या निवडणूक प्रचार कार्यालयाच्या उद्‍घाटनप्रसंगी ते बोलत होते. यावेळी सांत आंद्रेसाठी जाहीरनाम्याचे लोकार्पण करण्यात आले. कार्यक्रमाला सरचिटणीस मोहनदास लोलयेकर, संघटनमंत्री दुर्गादास कामत, दिलीप प्रभुदेसाई, पर्यावरण विभागाचे निमंत्रक विकास भगत आदी उपस्थित होते.

जगदीश भोबे म्हणाले, की भाजपने राजकीय फायद्यासाठी म्हादईशी तडजोड केली आहे. त्यांना आग्वादचा किल्ला देखील विकायचा आहे. आता ते सरकारी नोकऱ्या विकून, पात्र उमेदवारांना वंचित ठेवत आहे. निवडणुकीत खर्च करण्यासाठी भाजप पैसे जमा करत आहे असा आरोप भोबे यांनी केला. यावेळी विकास भगत, मोहनदास लोलयेकर यांच्यासह अन्य नेत्यांचीही भाषणे झाली.