E Rickshaw: ..लवकरच दिव्यांगांसाठी गोव्यात ई-रिक्षा! दिव्यांगजन आयुक्त, गोवा माईल्स यांच्यात करार

पणजी: गोव्याच्या आर्थिक विकासामध्ये दिव्यांग नागरिकांचा सहभाग वाढावा आणि त्यांचेही आर्थिक सक्षमीकरण सुनिश्चित करण्यासाठी, राज्य दिव्यांगजन आयुक्त कार्यालय आणि गोवा माईल्स यांनी हल्लीच एका सामंजस्य करारावर स्वाक्षरी करण्यात आली. सर्वसमावेशक गोवा उपक्रमाअंतर्गत पर्पल ई-रिक्षा सुरू करण्यात आली आहे. गोवा माइल्सच्या पोर्टलद्वारे ही सुविधा चालवली जाणार असल्याचे राज्य दिव्यांगजन सक्षमीकरण विभागाचे मंत्री सुभाष फळदेसाई यांनी सांगितले.

यावेळी गोवा राज्य दिव्यांगजन सक्षमीकरण विभागाचे माननीय मंत्री सुभाष फळदेसाई, राज्य दिव्यांगजन सक्षमीकरण विभागाचे सचिव ई. वल्लावन (आयएएस), राज्य दिव्यांगजन आयुक्त गुरुप्रसाद पावसकर, सचिव श्री. ताहा हाजिक, गोवा माईल्सचे व्यवस्थापकीय संचालक श्री. उत्कर्ष सुधीर दाभाडे व इतर अधिकारी उपस्थित होते.

सुभाष फळदेसाई म्हणाले की, या सहकार्य करारामुळे, दिव्यांग व्यक्तींना उपजिविकेचे शाश्वत साधन मिळवणे शक्य होणार आहे तसेच इतरांवर विसंबून न राहता फिरण्याचे स्वातंत्र्यदेखील त्यांना मिळणार आहे. गुरुप्रसाद पावसकर म्हणाले की, दिव्यांग व्यक्तींच्या दैनंदिन जीवनातील प्रत्येक पैलूमध्ये अधिक सुलभता आणि सर्वसमावेशकता सुनिश्चित करून त्यांचे जीवन समृद्ध करण्यासाठी आम्ही वचनबद्ध आहोत.