Dona Paula Jetty: ‘दोनापावला जेटीची निविदा रद्द करा’

Dona Paula Jetty: दोनापावला जेटीच्या खासगीकरणाची निविदा रद्द करावी, अशी मागणी प्रदेश काँग्रेसचे अध्यक्ष अमित पाटकर यांनी केली आहे. दोनापावला जेटी नूतनीकरणाच्या कामानंतर चार वर्षांनी खुली झाली.

ती खुली करताना पर्यटन खात्याने येथे भेट देणाऱ्या पर्यटकांकडून तिकीट आकारणी सुरू केली, तर स्थानिक गोमंतकीयांना मात्र येथे मोफत प्रवेश ठेवला. त्यात पर्यटकांमध्ये लहान मुलांना 25 आणि प्रौढांना 50 रुपये शुल्क आकारले गेले आहे. त्याशिवाय या ठिकाणी प्रवेशद्वार असल्याने पर्यटक घेऊन येणाऱ्या बसेस वाहनतळापर्यंत पोहचणे अवघड झालेले आहे.

तिकीट आकारणीचा परिणाम पर्यटकांची संख्या घटण्यावर झाल्याचा दावा शुक्रवारी काँग्रेसच्या नेत्यांनी केला होता.

दोनापावला जेटीचा ताबा खासगी कंत्राटदाराला दिला गेल्याने त्या ठिकाणाची जाहिरात पार्टी स्थळ, विवाह स्थळ अशा ठिकाणांना या स्थळांची छायाचित्रासह पोस्ट टॅग केलेली आहे.