टॅक्सीमध्ये डिजिटल मीटरचा वापर सुरू करा - मंत्री गुदिन्हो

पणजी: राज्यातील टॅक्सीमध्ये बसवण्यात आलेले डिजिटल मीटर वापरला जात नसल्याचे उघड झाल्यानंतर वाहतूक मंत्री माविन गुदिन्हो यांनी याची गंभीर दखल घेत टॅक्सी मालकांना मीटर वापरासंबंधी सक्त ताकीद दिली आहे. त्यामुळे सरकार आणि टॅक्स संघटनांमध्ये आरोप-प्रत्यारोप झाले आहेत. परंतु, लवकरात लवकर मीटरचा वापर करण्याबाबत सरकार अजूनही का विलंब करत आहे, असा प्रश्न लोकांनी उपस्थित केला आहे.

राज्यात येणारे पर्यटक आणि स्थानिकांना दिलासा देण्यासाठी टॅक्सीमध्ये मीटर बसवण्याची मागणी जोर धरत होती. त्यात मुंबई उच्च न्यायालयाच्‍या गोवा खंडपीठाने सक्ती केल्‍यानंतर मीटर बसवण्यात आले होते. परंतु, त्यांचा वापर केला जात नसल्याचे स्पष्ट झाले आहे. मीटर वापरले नाही, तर कारवाई करण्याचा इशारा मंत्री माविन गुदिन्हो यांनी दिला आहे. त्यासाठी मोहीम सुरू करणार असल्याचे सांगितले आहे. मात्र, अजूनही सरकारकडून काही ठोस कारवाई झालेली दिसत नाही.

मॉन्सून असूनही राज्यात मोठ्या संख्येत पर्यटक येत आहेत. यात मीटरचा वापर होणे आवश्‍यक असल्‍याचे मत पर्यटन उद्योगातील भागीदारांकडून व्यक्त होत आहे. गेले काही दिवस टॅक्सीमधील मीटरवरुन अनेक प्रश्न निर्माण झाल्याचे मंत्री गुदीन्हो यांनी बऱ्याचदा सांगितले आहे. मात्र तरी ही पर्यटकांना याबाबतीत समस्या जाणवत असल्याचे निरीक्षण त्यांनी नोंदवले आहे.