पणजी: शिरगाव येथील श्री देवी लईराईचा जत्रोत्सव दरवर्षी मोठ्या उत्साहात साजरा केला जातो. मात्र यंदाच्या जत्रोत्सवात मोठी दुर्घटना घडली. शनिवारी (3 मे) पहाटे जत्रोत्सवात चेंगराचेंगरी झाली. या चेंगराचेंगरीत सहा जणांचा मृत्यू झाला तर 40 हून अधिक भक्त गंभीर जखमी झाले. या घटनेच्या पार्श्वभूमीवर आता पर्यटन विभागाने कोलवा येथे होणारा स्पीरिट ऑफ गोवा फेस्टिव्हल रद्द केला. तर सरकारकडून पुढील तीन दिवसांत होणारे सर्व सरकारी समर्थित कार्यक्रम आणि सार्वजनिक उत्सव रद्द किंवा पुढे ढकलण्याचे निर्देश देण्यात आले.
दरम्यान, श्री देवी लईराई जत्रोत्सवात झालेल्या दुर्घटनेच्या पार्श्वभूमीवर पर्यटन विभागाने स्पीरिट ऑफ गोवा फेस्टिव्हल (Spirit of Goa Festival) रद्द करण्याची घोषणा केली. शनिवारी आणि रविवारी म्हणजेच 3 आणि 4 मे रोजी कोलवा येथील एसएजी ग्राऊंड्स येथे हा फेस्टिव्हल होणार होता. मात्र पर्यटन विभागाने हा फेस्टिव्हल रद्द केला.
पर्यटन विभागाकडून सांगण्यात आले की, लईराई देवीच्या जत्रोत्सवात झालेल्या दुर्घटनेबाबत आम्ही चिंतीत आहोत. या कठीण काळात गोव्यातील (Goa) लोकांच्या सुरक्षिततेला, कल्याणाला आणि त्यांच्या भावनांना आम्ही प्राधान्य देतो. पीडित कुटुंबियांच्या प्रती आम्ही मनापासून संवदेना व्यक्त करतो. तसेच, जखमी लोक लवकरात लवकर बरे होण्याची कामना करतो.
या घटनेनंतर लईराई देवस्‍थानचे अध्‍यक्ष दीनानाथ गावकर यांनी सांगितले की, "झालेली घटना अत्‍यंत दुर्दैवी आहे. त्‍याचा आम्‍हाला खेद आहे. काही धोंडगण आणि भाविकांच्‍या बेजबाबदारपणामुळे हा दुःखद प्रसंग ओढवला, त्यामुळे प्रशासन आणि देवस्‍थान समितीला दोष देणे चुकीचे ठरेल. पुढे कौल- प्रसाद आहे. तेव्‍हा भाविकांनी गर्दी टाळावी. पाचव्‍या दिवशी होणारी गर्दी लक्षात घेऊन प्रशासनानेही दक्षता बाळगावी."
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.