MLA Disqualification Petition: ये तो होना ही था! चोडणकरांची आमदार अपात्रता याचिका सभापती तवडकरांनी फेटाळली

MLA Disqualification Petition

पणजी: काँग्रेसमधून भाजपमध्ये पक्षांतर केलेल्या आठ आमदारांच्या विरोधात दाखल अपात्रता याचिका अखेर सभापती रमेश तवडकरांनी दोन वर्षानंतर फेटाळली. सभापती रमेश तवडकरांनी आज (०१ नोव्हेंबर) याबाबत निर्णय दिला. काँग्रेसने मात्र सभापतींच्या या निर्णयावर हे अपेक्षितच होते, असे मत नोंदवले आहे.

दोनवर्षापूर्वी काँग्रेसचे आठ आमदार पक्षांतर करुन भाजपमध्ये सामिल झाले होते. यावेळी विरोधी पक्षनेत्याची धुरा सांभाळणारे मायकल लोबो यांच्यासह इतर आमदारांनी भाजपमध्ये पक्ष प्रवेश केला होता. याविरोधात काँग्रेसच्या गिरीष चोडणकरांनी फुटीर आठ आमदारांविरोधात अपात्रता याचिका दाखल केली होती.

चोडणकरांची याचिका आज सभापती तवडकरांनी फेटाळून लावली यामुळे आठ आमदारांना दिलासा मिळाला आहे. ऐन दिवाळीत आलेल्या या निर्णयामुळे आमदारांची दिवाळी गोड झाली आहे.

“आम्हाला निकाल अपेक्षितच होता. हा निकाल म्हणजे फक्त झेरॉक्स कॉपी आहे. अपत्रता याचिकेवर दोन वर्षानंतर निकाल लागला यातच आमचे यश आहे. कायदेशीर सल्ला घेतल्यावर पुढची भूमिका जाहीर करणार,” असे याचिकाकर्ते गिरीश चोडणकर म्हणाले.

कोण आहेत आठ फुटीर आमदार

मायकल लोबो (कळंगुट)

दिगंबर कामत (मडगाव)

आलेक्स सिक्वेरा (नुवे)

रुडॉल्फ फर्नांडिस (सांताक्रुझ)

दिलायला लोबो (शिवोली)

केदार नाईक (साळगाव)

राजेश फळदेसाई (कुंभारजुवे)

संकल्प आमोणकर (मुरगाव)