Viral Video Controversy: पर्यटकाच्या इन्स्टाग्राम रीलमुळे वाद, टॅक्सी चालकांची एन्फ्लुएन्सरविरोधात पोलिसांत तक्रार

वास्को: एका व्हायरल इन्स्टाग्राम रीलमुळे मोठा वाद निर्माण झाला असून, टॅक्सी चालकांनी एका एन्फ्लुएन्सरविरोधात पोलिसांत तक्रार दाखल केली आहे.

दक्षिण गोवा टॅक्सी असोसिएशनने असा आरोप केला आहे की, व्हायरल झालेल्या व्हिडिओमध्ये टॅक्सी चालकांवर जास्त भाडे आकारल्याचा चुकीचा आरोप करण्यात आला असून, त्यांना ‘टॅक्सी माफिया’ असे संबोधण्यात आले आहे. तक्रारीनुसार, प्रवासाचे भाडे आधीच ठरवून दिले गेले होते. व्हिडिओतील दावे खोटे असून, ते त्यांच्या प्रतिष्ठेला हानी पोहोचवणारे आहेत. टॅक्सी चालकांनी यासंदर्भात वास्को पोलिसांशी संपर्क साधला आहे.

दक्षिण गोवा टॅक्सी असोसिएशनने एका इन्स्टाग्राम एन्फ्लुएन्सरने पोस्ट केलेल्या व्हिडिओबाबत स्पष्टीकरण मागण्यासाठी वास्को पोलीस स्थानकाला भेट दिली. या व्हिडिओमध्ये दोन महिन्यांपूर्वीच्या एका घटनेचा उल्लेख असून, दाबोळी आंतरराष्ट्रीय विमानतळावरून महाराष्ट्रातील मालवणपर्यंत प्रवासासाठी ५,५०० रुपये भाड्याने पर्यटक वाहन घेतल्याचे नमूद करण्यात आले आहे. संबंधित एन्फ्लुएन्सरने हे भाडे अदा केले असतानाही, गोव्यातील टॅक्सी चालकांना ‘माफिया’ असे संबोधल्याचा आरोप आहे.

या आरोपांमुळे स्थानिक टॅक्सी चालकांच्या प्रतिष्ठेला व उपजीविकेला धक्का बसल्याचे संघटनेने म्हटले आहे. त्यामुळे या प्रकरणाची तातडीने चौकशी करून संबंधित इन्फ्लुएन्सरवर योग्य कारवाई करावी, अशी मागणी वास्को पोलीस निरीक्षकांकडे करण्यात आली आहे. संघटनेच्या मते, विमानतळ ते मालवण या अंतरासाठी आणि वेळेचा विचार करता आकारलेले ५,५०० रुपये भाडे हे अधिकृत दरांनुसार वाजवी आहे.

कडक कारवाईची मागणी

गोव्यातील टॅक्सी व्यवसाय हा राज्याच्या अर्थव्यवस्थेचा महत्त्वाचा घटक आहे. पर्यटकांना सेवा देताना अनेकदा स्थानिक चालक प्रतिकूल परिस्थितीत काम करतात. एखादी वैयक्तिक तक्रार असल्यास ती संबंधित यंत्रणेकडे मांडण्याऐवजी संपूर्ण समूहावर आरोप करणे अयोग्य असल्याचे संघटनेने म्हटले आहे.

पोलिसांनी या प्रकरणाची दखल घेऊन संबंधित इन्फ्लुएन्सरवर तातडीने कारवाई करावी व अशा प्रकारच्या दिशाभूल करणाऱ्या सामग्रीवर आळा घालावा, अशी मागणी करण्यात आली आहे.