Goa Police: सुनीता सावंत आमदारांना सहकार्य करत नव्हत्या? दक्षिण गोवा पोलिस अधीक्षकांची तडकाफडकी बदली का केली?

पणजी: दक्षिण गोवा जिल्हा पोलिस अधीक्षक सुनीता सावंत यांच्या बदलीचा काल रात्री उशिरा तडकाफडकी आदेश काढण्यात आला. या पदाचा अतिरिक्त ताबा अंमलीपदार्थविरोधी कक्षाचे आयपीएस अधीक्षक टिकम सिंग यांच्याकडे देण्यात आला आहे.

अधीक्षक सावंत यांना पोलिस मुख्यालयात हजेरी लावण्यास सांगण्यात आले आहे. त्यांच्या अचानक झालेल्या या बदलीबाबत पोलिस वर्तुळात उलटसुलट चर्चा सुरू झाली आहे.

अधीक्षक सुनीता सावंत या दक्षिण गोव्यातील काही आमदारांना सहकार्य करत नसल्याच्या तक्रारी मुख्यमंत्र्यांकडे आल्या होत्या.

दक्षिण गोव्यात घडलेल्या एका गुन्ह्याप्रकरणी त्यांनी तपासकामात राजकारण्यांनी केलेली शिफारस फेटाळून लावली होती.

त्यामुळे काल सोमवारी रात्रीच सरकारकडून आदेश येण्यापूर्वीच आपण आपले कार्यालय सोडत असल्याचे पोलिस खात्याला त्यांनी कळविले व काही तासांनंतरच लगेच त्यांच्या बदलीचा आदेश आला.