मडगाव: महिला आणि मुले अनेकदा गुन्हेगारांच्या भुलभुल्‍लयाला बळी पडतात, गुन्हेगार त्यांचे शोषण करतात. गोव्‍यात काही वर्षांपूर्वी घडलेल्‍या सिरियल किलर महानंद नाईक याच्या गुन्‍हेगारी कृत्‍याकडे त्‍याच दृष्‍टीने बघण्‍याची गरज आहे. महानंदने कित्‍येक भोळ्‍याभाबड्या युवतींवर अत्‍याचार करून त्यांचे जीवन उध्‍वस्‍त केले. त्‍याचा हा गुन्‍हा मानवतेला काळिमा फासणारा होता, अशी प्रतिक्रिया या प्रकरणातील तपास अधिकारी असलेले माजी उपअधीक्षक सी.एल. पाटील यांनी व्‍यक्‍त केली.
आवदा व्हिएगस यांच्‍या ‘अ सायलेंट इन्व्हेटरेट सिरीयल किलर’ या पुस्‍तकाचे पाटील यांच्‍या हस्‍ते प्रकाशन झाले. यावेळी या प्रकल्‍पात संशोधन करणाऱ्या ॲड. सुगंधी एन. उपस्‍थित होत्‍या. हे पुस्तक सिरीयल किलर महानंद नाईक याच्या गुन्ह्यांवर प्रकाश टाकणारे असून ते ‘बायलांचो एकवोट’ या संघटनेने प्रकाशित केले आहे.
महिला आणि लहान मुले गुन्हेगारांच्या कृत्‍यांना कसे बळी पडतात आणि त्यांचे नंतर कसे शोषण केले जाते, हे या पुस्तकात अधोरेखित केले आहे. महानंदने कायद्याच्या अंमलबजावणीची दिशाभूल कशी केली आणि महत्त्वाचे पुरावे कसे नष्ट केले. ज्यामुळे त्याचे अनेक खून, आत्महत्या म्हणून दिसून आले, याचे तपशीलवार वर्णन त्‍यात केले आहे.
ॲड. सुगंधी म्हणाल्या, सिरीयल किलर आणि त्‍यांच्‍याकडून होणाऱ्या शोषणाच्‍या धोक्यांबद्दल लोकांना जागृत करणे, हा या पुस्‍तकामागचा मूळ हेतू आहे. व्हिएगस म्हणाल्या, हे पुस्तक केवळ गुन्ह्यांचे वर्णन नाही, तर समाज अशा घटनांना उदासीन वृत्तीने कसे दुर्लक्षित करतो, याचे प्रतिबिंब आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
