Goa Politics: श्रीपादभाऊंना सत्तरीतून सर्वाधिक मतदान

Goa Politics:

मतपेटीच्या माध्यमातून लोकांच्या मनात काय आहे ते निवडणुकीत व्यक्त होणार आहे. मी आणखी त्यावर काय बोलणार. उत्तर गोव्यातील भाजप उमेदवार श्रीपाद नाईक हे यावेळी बहुमताने निवडून येतील.

सत्तरीतून त्यांना सर्वाधिक मतांची आघाडी देण्याचा प्रयत्न आहे व इतिहास घडविला जाईल, असे मत आरोग्यमंत्री विश्‍वजित राणे यांनी पणजी येथील रुग्णवाहिका लोकार्पण कार्यक्रमावेळी बोलताना मत व्यक्त केले.

केंद्रीय राज्यमंत्री श्रीपाद नाईक हे गेली अनेक वर्षे भाजपचे खासदार आहेत. ते बहुमताने प्रत्येकवेळी निवडून आले आहेत. राज्यात त्यांच्याप्रमाणे निवडून आलेला नाही. त्यांनी केलेली कामे व खासदारकीच्या माध्यमातून केलेले आर्थिक साहाय्य यामुळे त्यांना सत्तरीतून पूर्ण पाठिंबा असेल.

पंतप्रधान नरेंद्र मोदींची विचारधारा त्यांच्या माध्यमातून राज्यात पोहचण्यास मदत होते व त्यांचे मार्गदर्शन लाभते. यावेळी ते उत्तर गोव्यातून मतांचा इतिहास घडविणार हे नक्की आहे. त्याचा फायदा राज्याला होणार आहे, असे राणे म्हणाले.

सामाजिक बांधीलकीच्या माध्यमातून केंद्रीय राज्यमंत्री श्रीपाद नाईक यांनी आरोग्य खात्याला ॲडव्हान्स लाईफ सेव्हिंग ४ रुग्णवाहिका उपलब्ध केल्या त्याचे लोकार्पण आज आल्तिनो - पणजी येथील वन भवन येथे झालेल्या कार्यक्रमात करण्यात आले.

आणखी रुग्णवाहिका!

गोव्यात रुग्णवाहिका कमी पडत आहेत. महामार्गावरील रस्ता अपघातांसाठी आणखी रुग्णवाहिका उपलब्ध करण्याचा विचार आहे. अपघातप्रवण क्षेत्रांची माहिती मिळवून आराखडा तयार केलेला आहे.

केंद्रीय राज्यमंत्री नाईक यांच्याकडे सीएसआरच्या माध्यमातून आणखी काही रुग्णवाहिका उपलब्ध करण्याची मागणी करण्यात आली आहे. हे सरकार लोकांचे जीवन वाचवण्यासाठी ज्या काही सुविधा उपलब्ध करायला हव्यात, त्यासाठी प्रयत्न करत आहे, असे मंत्री राणे म्हणाले.