Shivamogga-Goa Flight: कर्नाटकातील शिवमोग्गा विमानतळावरून गोव्याला जोडणारी विमानसेवा 21 नोव्हेंबरपासून सुरू करण्यात येत आहे. याशिवाय शिवमोग्गा ते हैदराबाद आणि शिवमोग्गा ते तिरूपती या फ्लाईट्सनाही सुरवात होणार आहे.
UDAN-RCS योजनेंतर्गत मंजूर केलेले तीन मार्ग स्टार एअरतर्फे चालवले जात आहेत. 31 ऑगस्टपासून इंडिगो एअरलाइन्स बेंगळुरू-शिवमोग्गा मार्गावर कार्यरत आहेत.
स्टार एअरने आणखी तीन मार्ग सुरू केल्यामुळे, शिवमोग्गा विमानतळावरून आता बेंगळुरू, हैदराबाद, गोवा आणि तिरुपतीला प्रवाशांना जाता येईल.
शिवमोग्गाचे लोकसभा खासदार बी. वाय. राघवेंद्र म्हणाले की, लवकरच नवी दिल्लीसाठीदेखील फ्लाईट सुरू केली जाईल. बेंगळुरूला जाणार्‍या फ्लाइटची सरासरी 78 ते 79 टक्के इतकी आहे. यावरून विमानतळाची क्षमता दिसून येते. येत्या काही दिवसांत विमानतळावरून उड्डाणांची संख्या वाढेल.
नवीन मार्गांना प्रवाशांच्या प्रतिसादाबद्दल ते म्हणाले की, “पहिल्या फ्लाइटने तब्बल 63 लोक तिरुपतीला जात आहेत. आणखी 25 लोक तिरुपतीहून शिवमोग्गा येथे परतणार आहेत. 43 जण हैदराबादहून शिवमोग्गाला तर 41 जण शिवमोग्गाहून हैदराबादला जाणार होते.
55 जण गोव्याला जाणार आहेत तर 33 जण गोव्यातून परतणार आहेत. जर आम्ही बेंगळुरूला जाणाऱ्यांचा समावेश केला तर दररोज सुमारे 400 प्रवासी शिवमोग्गा येथील विमानतळाचा लाभ घेत आहेत.”
डिसेंबरपर्यंत नाईट लँडिंग
दरम्यान, या विमानतळावर फ्लाइट ऑपरेशन सुरू झाल्यापासून, तांत्रिक कारणांमुळे लँडिंग तीन वेळा रद्द करण्यात आले. व्हिज्युअल फ्लाइट नियम (VFR) संदर्भात काही समस्या आहेत. थंडीच्या मोसमात दृश्यमानता कमी असल्याने विमानसेवा प्रभावित झाली आहे.
या समस्येकडे लक्ष दिले जात आहे. ते लवकरच सोडवले जातील आणि नाईट लँडिंग सुविधा डिसेंबरपर्यंत कार्यान्वित होईल, असेही त्यांनी सांगतिले.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.