शिरगावात 'मॉक ड्रिल' यशस्वी; मात्र नियोजनात मोठी विसंगती, दीड हजार कर्मचाऱ्यांचा सहभाग; जेवणाची व्यवस्था नसल्याने उपासमारीची वेळ

डिचोली: श्री लईराई देवीच्या जत्रेच्या पार्श्वभूमीवर काल (शनिवारी) मध्यरात्री शिरगाव येथे घेण्यात आलेले ''मॉक ड्रिल'' यशस्वी ठरले, मात्र मोहिमेच्या आयोजनात विसंगती दिसून आली. धक्कादायक बाब म्हणजे मध्यरात्रीपर्यंत ताटकळत राहिलेल्या पोलिसांसह सुरक्षा व्यवस्थेशी संबंधित बहुतेक कर्मचाऱ्यांवर चक्क उपासमारीची वेळ आली.

''मॉक ड्रिल''मध्ये सहभागी पोलिसांसह अन्य कर्मचाऱ्यांच्या जेवणाची कोणतीही व्यवस्था करण्यात आलेली नव्हती. परिणामी, रात्रभर या कर्मचाऱ्यांना उपाशी राहावे लागले. या प्रकाराबाबत बहुतेक कर्मचाऱ्यांनी नाराजी व्यक्त केली. देश-विदेशात नावलौकिक प्राप्त झालेल्या लईराई देवीच्या जत्रेच्या पार्श्वभूमीवर काल (शनिवारी) रात्री शिरगाव येथे हे ''मॉक ड्रिल'' घेण्यात आले.

जत्रेदरम्यान एखादी आपत्तीजनक परिस्थिती निर्माण झाल्यास त्याचा सामना कसा करावा तसेच मदतकार्य कसे करावे, याची तालीम करण्यासाठी गोवा जिल्हाधिकाऱ्यांच्या आदेशानुसार आपत्कालीन व्यवस्थापन यंत्रणेतर्फे हे ''मॉक ड्रिल'' घेण्यात आले.

जिल्हाधिकारी अंकित यादव यांची उपस्थिती

उत्तर गोव्याचे जिल्हाधिकारी अंकित यादव यांच्या मार्गदर्शनाखाली हे ''मॉक ड्रिल'' पार पडले. यामध्ये कमांडो, पोलीस, अग्निशमन दल, आरोग्य आणि अन्य आपत्कालीन यंत्रणांचे मिळून सुमारे दीड हजार कर्मचारी सहभागी झाले होते.

पूर्वनियोजनानुसार रात्री नऊ वाजता हे ''मॉक ड्रिल'' होणार होते. त्यासाठी पोलीस आणि इतर कर्मचारी सायंकाळीच शिरगावात दाखल झाले होते. मात्र, मध्यरात्रीपर्यंत प्रत्यक्ष ''मॉक ड्रिल'' सुरू झाले नव्हते.

मध्यरात्री पोलिसांना त्यांचे ड्युटी पॉइंट दाखविल्यानंतर होमकुंड परिसरात ''मॉक ड्रिल'' घेण्यात आले. तत्पूर्वी संबंधित विविध खात्यांच्या अधिकाऱ्यांकडून सुरक्षा व्यवस्थेचा आढावा घेण्यात आला. या ''मॉक ड्रिल''मध्ये विविध शासकीय खात्यांचे प्रमुख सहभागी झाले होते.