Shigmotsav In Dicholi: रंग, मुखवटे आणि पिचकाऱ्या! शिमग्याच्या साहित्याने फुलला बाजार

डिचोली: शिमगा म्हणजे रंगांची उधळण करण्याचा आणि वेगवेगळी ‘सवंगे’ रंगविण्याचा असा उत्साहाचा उत्सव. सध्या डिचोलीत सर्वत्र शिमग्याचे वातावरण फुलू लागले असून, शिमग्यानिमित्त गुलाल, पिचकाऱ्या, मुखवटे आदी साहित्याने डिचोली बाजारही फुलला आहे. या साहित्याची खरेदीही सुरू झाली असून, पुढील दोन दिवसांत या साहित्याच्या खरेदीला जोर येणार आहे. तशी शक्यताही दुकानदार व्यक्त करीत आहेत.

शिमगा म्हणजे रंगांची उधळण करण्याचा उत्सव. त्यामुळे बाजारात विविध प्रकारचे रंग (गुलाल) विक्रीस उपलब्ध झाले आहेत. गेल्या काही वर्षांपासून नैसर्गिक रंगांना मागणी असल्याने यंदाही विक्रेत्यांनी नैसर्गिक रंग उपलब्ध केले आहेत.

डिचोलीतील बहुतेक सर्व भागात रंगपंचमी किंवा धुळवड साजरी करण्यात येत असल्याने रंगांना मागणी असते. त्यामुळे बाजारात लाल, पिवळा, निळा आदी विविध प्रकारचे रंग उपलब्ध झाले आहेत. गुरुवारी (ता. १३) रात्री गावोगावी होळी पेटल्यानंतर सर्वत्र शिमग्याचा माहोल तयार होणार आहे.

विविध प्रकारचे साहित्यही बाजारात उपलब्ध असून, त्यांची खरेदीही सुरु आहे. उद्यापासून साहित्य खरेदीला जोर येण्याची शक्यता विक्रेत्यांकडून व्यक्त करण्यात येत आहे. काळ बदलत असला, तरी अजूनही खास करुन ग्रामीण भागात मुखवटे, गुलाल आदी साहित्याला मागणी आहे, असे शहरातील एक घाऊक विक्रेते विद्याधर शिरोडकर यांनी सांगितले.

साहित्याचे दर वाढले!

शिमग्यानिमित्त बाजारात विविध आकाराच्या आणि वेगवेगळ्या प्रकाराच्या पिचकाऱ्या विक्रीस उपलब्ध झाल्या आहेत. १०० रुपये ते ८५० रुपयेपर्यंतच्या पिचकाऱ्या विक्रीस उपलब्ध असून, या पिचकाऱ्या लहान मुलांचे लक्ष वेधून घेत आहेत. विविध प्राण्यांच्या चेहऱ्यांशी मिळतेजुळते आणि अक्राळविक्राळ मुखवटेही बाजारात उपलब्ध झाले असून, हे मुखवटेही लक्ष वेधून घेत आहेत. ८०० रुपये किमतीपर्यंतचे मुखवटे बाजारात उपलब्ध झाले आहेत. एकूण गेल्या वर्षीच्या तुलनेत यंदा शिमगोत्सवाच्‍या साहित्याचे दर वाढलेले आहेत.